აშშ-ის სენატის საგარეო ურთიერთობათა კომიტეტის თავმჯდომარე ჯიმ რიში ,,ევროპული საქართველოს" ერთ-ერთი ლიდერის გიგი უგულავას დაკავებას სოციალურ ქსელ „ტვიტერში“ ეხმაურება.
„იმედგაცრუებული ვარ, რომ საქართველომ გადაწყვიტა გააძლიეროს პოლიტიკურად მოტივირებული ძალადობა ოპოზიციონერ პოლიტიკოსებზე. გასულ კვირას, საქართველოს საგარეო საქმეთა მინისტრსაც ვუთხარი, რომ სასამართლოს დამოუკიდებლობის დაშლა და ოპოზიციის დევნა მიუღებელია", - წერს სენატორი.
შეგახსენებთ, უზენაესმა სასამართლომ გიგი უგულავა დამნაშავედ ცნო. დედაქალაქის ყოფილ მერს ე.წ ფონდის საქმეზე თანხის გაფლანგვისთვის 3 წლით თავისუფლების აღკვეთა შეეფარდა.
გიგი უგულავა სამართალდამცველებს გუშინ ჩაბარდა.
ცნობისთვის, აშშ-ის სენატის საგარეო ურთიერთობათა კომიტეტის თავმჯდომარე, რესპუბლიკელი სენატორი ჯიმ რიში, ერთ-ერთი მათგანია, ვინც საქართველოს ხელისუფლებას ვაშინგტონიდან კრიტიკული წერილით მიმართა.
5 თებერვალს კი სენატორი აშშ-ში ვიზიტად მყოფ საგარეო საქმეთა მინისტრ დავით ზალკალიანს შეხვდა, რის შემდეგაც ევროპისა და რეგიონული უსაფრთხოების თანამშრომლობის ქვეკომიტეტის დემოკრატ ლიდერ ჯინ შაჰინთან ერთად განცხადება გაავრცელა.
I'm disappointed Georgia has chosen to increase its politically motivated abuse of opposition politicians. As I told the Georgian foreign minister last week, the collapse of judicial independence & persecution of the opposition is unacceptable behavior. https://t.co/jiY8cvdqXL
— U.S. Senate Foreign Relations Committee (@SenateForeign) February 11, 2020
