"გირჩის" ლიდერი ზურაბ გირჩი ჯაფარიძე სოციალურ ქსელში Facebook-ის პირდაპირ ეთერში საქალაქო სასამართლოდან ჩაერთო და განაცხადა, რომ მათ პარტიას აჯარიმებენ.
მისი თქმით, აუდიტის სამსახური პარტიას იმის გამო უჩივის, რომ სატელევიზიო არხ "გირჩი TV-ზე" უფასოდ გაუშვეს მათი პარტიის რეკლამა.
"სამი დღეა არჩევნებამდე დარჩენილი და სასამართლოში გვიჩივლეს ისევ. უნდათ რომ აქ დაგვაკარგინონ დრო. აუდიტის სამსახური გვიჩივის იმაზე, რომ "გირჩი TV-მ" გაუშვა თურმე პოლიტიკური პარტია "გირჩის" რეკლამა უფასოდ", - აცხადებს ჯაფარიძე.
მისივე ინფორმაციით, აუდიტის სამსახურმა რეკლამა 828 ლარის ოდენობით შეაფასა და ჯარიმა ორმაგი თანხით განსაზღვრა.
"გვაქვს ჩვენი ტელევიზია, ისედაც სულ "გირჩის" რაღაცეები გადის. თუ რამე პოლიტიკური ტოქ-შოუ გადის ჩვენი შოუა. ნებისმიერი შეიძლება ჩათვალოთ, რომ ჩვენი რეკლამაა. მეტიც, ამ ტელევიზიას ლოგოდ ახატია პარტიის ლოგო. ამ ტელევიზიას ედავებიან, რა "პონტში" გაუშვით "გირჩის" რეკლამაო და გვაჯარიმებენ 1600 ლარით," - ამბობს "გირჩის" ლიდერი.
