"ქართული ოცნების" წევრი ირაკლი ზარქუა, სოციალურ ქსელში ავსტრალიელი ქალის მკვლელობის საქმეზე ბრალდებულის დაკავებას ეხმაურება.
მანამდე სოციალურ ქსელში გავრცელდა ინფორმაცია, რომ მკვლელობაში ბრალდებული რაფაელ მურსაკულოვი "ქართული ოცნების" წევრი იყო.
"დაახლოებით ნახევარ საათში ათზე მეტი ზარი განხორციელდა ნაცმოძრაობის ტელევიზიებიდან და სააგენტოებიდან. აჟიტირებულები არიან - თქვენმა აქტივისტმა ჩაიდინა მკვლელობაო, უკვე ჩანს, ამაზე აპირებენ ხანგძლივი კამპანიის აწყობას...
ახლა კარგად მომისმინეთ!
"ქართულ ოცნებას" ათობით ათასი წევრი და ასობით ათასი მხარდამჭერი ჰყავს და ყველას ზრახვებსა, თუ ფიქრებზე პასუხს ნამდვილად ვერ ვაგებთ.
თქვენ მკვლელები და მანიაკები ხელისუფლებაში და ძალოვან უწყებებში უმაღლეს თანამდებობებზე გყავდათ დანიშნული, ახლაც არ გაკლიათ "ლიდერშიპში" და ამის მიუხედავად, ხალხს ისევ თქვენი მხარდაჭერისკენ მოუწოდებთ.
აქეთ კი სამარცხვინო კამპანიას იმაზე აწყობთ, თითქოს ათიათასობით ჩვენი აქტივისტიდან იმ მართლაც ამაზრზენი დანაშაულის ჩამდენი რომ გამოერია.
ამიტომ, ნუ შეეცდებით ამ ტრაგედიით მორიგ პოლიტიკურ სპეკულაციას და უკადრებელის კადრებაში ახალი რეკორდის დამყარებას," - წერს ირაკლი ზარქუა სოციალურ ქსელში.
ცნობისთვის, ავსტრალიელი პედაგოგის, შანაი ბრუკის მკვლელობისთვის, 33 წლის რაფაელ მურსაკულოვი დააკავეს.
