ოქსფორდის უნივერსიტეტი და ანგლო-შვედური ფარმაცევტული კომპანია AstraZeneca კორონავირუსის "ომიკრონის" შტამის საწინააღმდეგო ვაქცინას შეიმუშავებენ. Report.ge-ს ცნობით, ამის შესახებ გამოცემა The Financial Times წერს.
„ჩვენს პარტნიორ AstraZeneca-სთან ერთად წინასწარი ნაბიჯები გადავდგით განახლებული ვაქცინის წარმოებისთვის“, - განაცხადა ოქსფორდის კვლევითი ჯგუფის ხელმძღვანელმა, სენდი დუგლასმა.
ოქსფორდის კვლევითი ჯგუფის ხელმძღვანელის თქმით, ადენოვირუსზე დაფუძნებული ვაქცინები (მაგალითად, ოქსფორდის უნივერსიტეტისა და AstraZeneca-ს მიერ წარმოებული ვაქცინები) შესაძლებელია ნებისმიერი ახალი შტამის საწინააღმდეგოდ იქნას გამოყენებული.
საჭიროების შემთხვევაში, მკვლევარები ვაქცინის მოდიფიკაციის შემუშავებას 100 დღის განმავლობაში შეძლებენ.
უახლესი კვლევების თანახმად, Pfizer-BioNTech-ის ვაქცინის ორი დოზა კორონავირუსის "ომიკრონ" შტამით ინფიცირების შემთხვევაში ჰოსპიტალიზაციის რისკს 70%-ით ამცირებს.
რაც შეეხება ბუსტერულ დოზას,Report.ge წერდა, რომ Pfizer/BioNTech-ის ვაქცინის სამი დოზა კორონავირუსის ახალ შტამს "ომიკრონს" ანეიტრალებს.
ჯანდაცვის მსოფლიო ორგანიზაციამ სამხრეთ აფრიკაში გამოვლენილ კორონავირუსის ახალ ვარიანტს "ომიკრონი“ დაარქვა. "ომიკრონი“ ბერძნული ანბანის მე-15 ასოა (Ο).
COVID-ის ახალი საშიში შტამი ბრიტანელმა მეცნიერებმა აღმოაჩინეს. ის წინა შტამებზე უფრო საშიში და ვაქცინებისადმი მდგრადია, თუმცა ჯერჯერობით ფართოდ გავრცელებული არ არის. ექსპერტები თვლიან, რომ COVID-ის ახალი ვარიანტი ბოტსვანაში წარმოიშვა. ის 32 მუტაციას შეიცავს.
კორონავირუსის ახალი შტამი B1.1.529 თავდაპირველად აფრიკის ექვს ქვეყანაში აღმოაჩინეს - სამხრეთ აფრიკაში, ბოტსვანაში, ესვატინში, ლესოტოში, ნამიბიასა და ზიმბაბვეში.
