მსოფლიოს დიდი ნაწილი წყალდიდობის, ქარიშხლებისა და გვალვებისთვის მოუმზადებელია. ამის შესახებ გაერო-ს მსოფლიო მეტეოროლოგიური ორგანიზაციის ანგარიშშია საუბარი.
გამოცემა Associated Press აღნიშნავს, რომ 2000 წლიდან მოყოლებული, წყალდიდობასთან დაკავშირებული სტიქიური მოვლენების რიცხვი მსოფლიოში 134%-ით გაიზარდა. სტიქიური მოვლენები განსაკუთრებით გახშირებულია აზიაში, კერძოდ ჩინეთში, ინდოეთში, ინდონეზიაში, იაპონიაში, ნეპალსა და პაკისტანში.
გვალვასთან დაკავშირებული კატასტროფების სიხშირე იმავე პერიოდში გაიზარდა 29%-ით. ამ მხრივ, ყველაზე დიდი დანაკლისი აფრიკას მიადგა. გარდა ამისა, გვალვის შედეგად ყველაზე დიდი ეკონომიკური ზარალი განიცადა ჩრდილოეთ ამერიკამ, აზიამ და კარიბის ზღვის აუზმაც.
გაერო-ს მიერ მომზადებული ანგარიშის თანახმად, გლობალურად ყველა ქალაქის 25% უკვე განიცდის წყლის რეგულარულ დეფიციტს. ბოლო ორი ათწლეულის განმავლობაში, პლანეტის მთლიანი ზედაპირული და მიწისქვეშა წყლების დონე ყოველწლიურად 1 სანტიმეტრით მცირდება.
გაეროს მიაჩნია, რომ მოსახლეობის ზრდა კიდევ უფრო მეტ ზეწოლას მოახდენს წყლის მარაგზე. მეცნიერები ვარაუდობენ, რომ 2050 წლისთვის 5 მილიარდზე მეტი ადამიანი წყლის გარეშე დარჩება.