ნიგერიის დაავადებათა კონტროლის ცენტრის განცხადებით, ბოლო 11 დღის განმავლობაში ფედერაციის სამ შტატში "ყვითელი ცხელების" 222 შესაძლო შემთხვევა გამოვლინდა.
ცენტრის ინფორმაციით, "ყვითელი ცხელებით" გარდაცვლილია 76 ადამიანი. შემთხვევები 1-დან 11 ნოემბრის პერიოდში ბაუჩის, ენუტუსა და დელტის შტატებში დაფიქსირდა.
ყვითელი ცხელება წარმოადგენს მწვავე ვირუსულ ჰემორაგიულ დაავადებას, რომელიც გადაეცემა ინფიცირებული კოღოს საშუალებით. სიტყვა „ყვითელი“ მიგვანიშნებს დაავადების თანმხლებ სიმპტომზე - სიყვითლეზე, რომელიც უვითარდება პაციენტთა გარკვეულ ნაწილს. დაავადების მძიმე ფორმის და მკურნალობის გარეშე, ლეტალური გამოსავალი მოსალოდნელია შემთხვევათა 50 %-ში.
ყოველწლიურად ყვითელი ცხელებით მსოფლიოში 200 ათასამდე ადამიანი ინფიცირდება, საიდანაც 30 ათასთან ლეტალური შედეგი დგება.
ყვითელი ცხელების შემთხვევები ფიქსირდება 47 ენდემურ ქვეყანაში, აფრიკაში, ცენტრალურ და სამხრეთ ამერიკაში. წლიურად ანგარიშგებულ შემთხვევათა 90% მოდის აფრიკის სუბ-საჰარის ტერიტორიაზე.