გერმანელმა მეცნიერებმა დაადგინეს, რომ SARS-CoV-2-მა შეიძლება თვალში შეაღწიოს და ბადურის ფოტორეცეპტორები და განგლიური უჯრედები დააინფიციროს. ამის შესახებ სამედიცინო გამოცემა bioRxiv.org–ის მიერ გამოქვეყნებულ კვლევაშია საუბარი.
ეს შეიძლება იყოს ერთ-ერთი მიზეზი, რის გამოც კორონავირუსისგან გამოჯანმრთელებული პაციენტები თვალის პრობლემებს უჩივიან.
კვლევებმა აჩვენა, რომ კორონავირუსით ინფიცირებულ ზოგიერთ პაციენტში ბადურის ორგანულებში SARS-CoV-2 ნუკლეოკაფსიდური ცილები აღმოჩნდა. რაც ადასტურებს, რომ COVID-19-ს ბადურის ინფიცირება მართლაც შეუძლია.
დეტალურმა ანალიზმა გამოავლინა, რომ ბადურის ფოტორეცეპტორებსა და განგლიურ უჯრედებში ინფექციაა შესული, რაც, ავტორების აზრით, მიუთითებს ვირუსის გამრავლების ადგილებზე. გარდა ამისა, აღმოჩნდა, რომ SARS-CoV-2 აძლიერებდა რამდენიმე ანთებითი გენის გამოხატულებას, მათ შორის ციტოკინ ინტერლეუკინ 33 (IL33), რომელიც დაკავშირებულია ბადურის ანთებასთან და ფოტორეცეპტორების დეგრადაციასთან.
კვლევის ავტორებმა ასევე აღმოაჩინეს, რომ ანტისხეულები, რომლებიც ბლოკავს ანგიოტენზინ-გარდამქმნელ ფერმენტს (ACE2), რეცეპტორი, რომლის მეშვეობითაც ვირუსი შედის უჯრედებში, ამცირებს ბადურის უჯრედების ინფექციას. ეს ნიშნავს, რომ ამ გართულების პროფილაქტიკისა და მკურნალობისთვის სპეციალური საშუალებები არ არის საჭირო, მაგრამ შესაფერისია იგივე ანტივირუსული პრეპარატები ან ვაქცინები, რომლებიც მიზნად ისახავს ACE2 რეცეპტორის ბლოკირებას.
კვლევის შედეგების საფუძველზე, გერმანელმა მეცნიერებმა დაასკვნეს, რომ SARS-CoV-2 ინფექცია თვალებში და ბადურის უჯრედებში ვირუსის გამრავლება დამოკიდებულია ACE2 რეცეპტორებზე და მათზე ორიენტირებული მედიკამენტები შეიძლება ეფექტური იყოს სიმპტომური კოვიდ პაციენტებისთვის.
