აფხაზეთში კორონავირუსით ინფიცირებულთა რიცხვი გაიზარდა.
ადგილობრივი მედიის ცნობით, დღეს აფხაზეთში კორონავირუსის ოთხი ახალი შემთხვევა გამოვლინდა.
გავრცელებული ინფორმაციით, ოთხივე ინფიცირებული კარანტინში იმყოფებოდა.
სულ, გასული დღე ღამის განმავლობაში, აფხაზეთში Covid 19-ზე 33 ტესტი ჩატარდა.
„სპუტნიკის“ ინფორმაციით, 3 მაისს სასტუმროში 14 დღიან კარანტინში კურსანტები არიან განთავსებული, რომლებიც სოხუმში რუსეთიდან ჩავიდნენ.
ამ დრომდე აფხაზეთში კორონავირუსის მხოლოდ 3 შემთხვევა ფიქსირდებოდა. ყველა მათგანი გუდაუთის საავადმყოფოში მკურნალობდა. ორი პაციენტი გამოჯანმრთელდა, ერთი კი გარდაიცვალა.
პირველი შემთხვევა 7 აპრილს, გაგრაში გამოვლინდა.
28 მარტიდან 20 აპრილამდე აფხაზეთში საგანგებო მდგომარეობა მოქმედებდა. 20 აპრილიდან ქალაქ სოხუმსა და აფხაზეთის რეგიონებში განახლდა კვების პროდუქტებისა და სასოფლო-სამეურნეო ბაზრების მუშაობა.