ცნობილი ქართველი ფოტოგრაფი გიორგი აბდალაძე ერთ თვეზე მეტია პირველ საუნივერსიტეტო კლინიკაში მკურნალობს. ამჟამად, მისი მდგომარეობა სტაბილურია, თუმცა, რამდენიმე დღის წინათ, უგონო მდგომარეობაში, აპარატზე იყო შეერთებული.
როგორც გიორგი აბდალაძემ Report.ge-ს უთხრა, ის რომ ხელახლა დაიბადა, ლევან რატიანის დამსახურებაა.
"ორი დაბადების დღე მაქვს, აგვისტოში და აპრილში. რაც რეანიმაციაში ვიწექი, იყო პერიოდი, როცა ყველას დავემშვიდობე და ყველაფერს. უიმედო იყო ჩემი მდგომარეობა. არავის ვუსურვებ რეანიმაციაში მოხვედრას, იქ საერთოდ სხვა სამყაროა - სრული ჯოჯოხეთური მდგომარეობა. აღწერაც მიჭირს. ათი დღის წინათ, ფაქტობრივად, ვიყავი მიცვალებული. დღეს უკეთესად ვარ, ვსუნთქავ, ძალა მაქვს და იმედი. ლევან რატიანი ჯადოქარია. ის სასწაულებს ახდენს.
ყველაფერი მაქვს ნანახი: ომი, ციხე და ა.შ. მაგრამ ასეთი რამ ვერც წარმომედგინა. დაუჯერებელია რასაც ექიმები და ექთნები აკეთებენ. რა ენერგიით, რა შემართებით უძლებენ ამ ყველაფერს?! ზოგი 10 დღე არ მიდის სახლში. ამას სამსახური არ ჰქვია, ამას გმირობა ჰქვია და მათ ექიმები კი არა, სიცოცხლის გადამრჩენები უმდა ერქვათ.
მინდა, გადავიღო რეპორტაჟი და ვაჩვენო ხალხს, რა ხდება რეანიმაციაში. როგორ ებრძვიან ექიმები სიკვდილს შიშველი ხელებით. ბატონი ლევანი არის საოცარი ექიმი და პიროვნება. კვირების განმავლობაში, ფილტვებს საკუთარი ხელით მიმუშავებდა, რომ გადავერჩინე" - ამბობს გიორგი აბდალაძე.
როგორც გიორგი ამბობს, გადაღებაზე დაინფიცირდა და დააავადება მაღალი სიცხეებით დაეწყო.
"ერთხელ ჩამოვიხსენი პირბადე და ზუსტად მაშინ დავინფიცირდი.
ხშირად მესმის ეჭვები ვაქცინაციასთან დაკავშირებით. ადამიანებო, მე შემომხედეთ, ჩემნაირ ადამიანებს შეხედეთ რეანიმაციებში და გაითვალისწინეთ, ეს ძალიან ვერაგი დაავადებაა და მისგან თავის დაცვა მხოლოდ ვაქცინაციის, პირბადისა და დისტანციის საშუალებითაა შესაძლებელი", - თქვა Report.ge-სთან საუბრისას გიორგი აბდალაძემ.
