საზოგადოების შეკვეთა იყო, რომ მოხსნილიყო ყველა შეზღუდვა და არ ყოფილიყო „ლოქდაუნი“. სახელმწიფო ამაზე წამოვიდა. ახლა ზოგიერთები ამასთან დაკავშირებით უკმაყოფილებას გამოთქვამენ, - ამის შესახებ ინფექციური საავადმყოფოს ხელმძღვანელმა თენგიზ ცერცვაძემ განაცხადა.
მისი თქმით, თუ საზოგადოება რეგულაციებს არ იცავს, ასეთ შემთხვევაში სახელმწიფოს სიმკაცრის გამოჩენა უწევს.
„თუ მთავრობა გეტყვის, რომ ნუ გამართავ ქორწილს, ეს ბიზნესი ხომ არაა? თუ მოსახლეობას არ აქვს მაღალი პასუხისმგებლობის დონე და ის დაარღვევს ყველა რეგულაციას, ბერკეტი მაშინ იქნება სისასტიკე და სიმკაცრე, რისი გაკეთებაც საქართველოში არ უნდათ. თქვენ იცით, როგორ მართავდნენ პანდემიას ჩინეთში, როცა ერთ თვეში მოსპეს ვირუსი? გინდათ, ეს მოხდეს საქართველოში? იცით, როგორ მართავდნენ, სახელმწიფო ნაწილები რომ იდგნენ ავტომატებით? ეს ხომ არ გვინდა?“ - განაცხადა ცერცვაძემ.
