„ღამის კურიერი“ სამაუწყებლო კომპანია რუსთავი 2-ის აღმასრულებელი დირექტორის, ირაკლი იმნაიშვილის განცხადებას ავრცელებს, რომელიც 19 იანვარს ეთერში მამუკა ხაზარაძესა და ალეკო ელისაშილს შორის მომხდარ ინციდენტს უკავშირდება.
„რუსთავი 2-სთვის განსაკუთრებულად მნიშვნელოვანი ამოცანაა განსხვავებული პოზიციების წარმოჩენა და დიალოგის პლატფორმის შექმნა.
ვწუხვართ, რომ ბატონ მამუკა ხაზარაძეს შეექმნა შთაბეჭდილება, თითქოს, „ღამის კურიერის“ 19 იანვრის ეთერში მომხდარი ინცინდენტი იყო წინასწარ დაგეგმილი.
ჩვენმა მაყურებელმა იცის, რომ „ღამის კურიერის“ მთავარი სარედაქციო ფასეულობაა ურთიერთპატივისცემა. გადაცემის მიზანი არ ყოფილა სანახაობის დადგმა ან პოლიტიკოსების ხელოვნური დაპირისპირება.
თუმცა, გადაცემის ფორმატი დაირღვა და პირდაპირ ეთერში სიტუაციის დეესკალაცია ვერ მოხერხდა. რუსთავი 2-მა ვერ უზრუნველყო სტუმრებისათვის კონსტრუქციული გარემოს შექმნა.
ჩვენს მაყურებელს და გადაცემის სტუმრებს ვუხდით ბოდიშს.
19 იანვრის სამწუხარო ინციდენტის გამოყენება რუსთავი 2-ის წინააღმდეგ მიზანმიმართული კამპანიის ნაწილია იმ ჯგუფის მხრიდან, ვინც 26 წლიანი ისტორიის მქონე ტელეკომპანიის ეთერიდან გათიშვა ერთხელ უკვე სცადა. რუსთავი 2-ის ისტორია, არის საქართველოს უახლესი ისტორიის სარკე.
სამწუხაროდ, იყო პერიოდი, როცა ტელეკომპანია ღიად ატარებდა პოლიტიკური ჯგუფის ინტერესებს. ამ ჯგუფის მხრიდან ტელეკომპანიაზე კონტროლის დაკარგვის შემდეგ ისინი ცდილობენ გააქრონ რუსთავი 2 და ცილი დასწამონ აქ მომუშავე ადამიანებს.
ჩვენი სარედაქციო ამოცანაა, ვიყოთ პლატფორმა ყველა მხარისთვის, მივცეთ მათ აზრის გამოხატვის შესაძლებლობა და ყველა პოლიტიკურ ძალას გავუწიოთ ოპონირება.
პოლიტიკური კრიზისის დაწყებიდან ჩვენ ვცდილობთ გავწიოთ ფასილიტაცია, რომ პრობლემა დიალოგის გზით მოგვარდეს. ეს აღნიშნულია ევროკავშირისა და „გაეროს განვითარების ფონდის“ მიერ დაკვეთილი მედიამონიტორინგის კვლევაშიც.
ჩვენ ყველაფერს გავაკეთებთ, რომ შევინარჩუნოთ დიალოგის პლატფორმა, რომელიც მაყურებელს საშუალებას აძლევს მოუსმინოს ყველა პოლიტიკურ ძალას და ინფორმირებული არჩევანი გააკეთოს“,- ირაკლი იმნაიშვილის განცხადებაში.
ცნობისთვის, გუშინ პარტია ,,მოქალაქეების" ლიდერი ალეკო ელისაშვილი და ,,ლელო საქართველოსთვის" ლიდერი მამუკა ხაზარაძე ერთმანეთს დაუპირისპირდნენ. ,,რუსთავი 2-ის" ეთერში მწვავე კამათის დროს პოლიტიკოსებმა ერთმანეთისკენ გაიწიეს.
როგორც მოგვიანებით მამუკა ხაზარაძემ "მთავარი არხის" ეთერში განაცხადა, ის ტელეკომპანიის მხრიდან, ელისაშვილთან დებატის შესახებ ინფორმირებული არ იყო და მისი სტუმრობისას ოპონენტის სტუდიაში შეყვანა, წინასწარ დაგეგმილ პროვოკაციად შეაფასა.
