CNN-ის სამოგზაურო პორტალმა CNN travel იმ ქვეყნების ჩამონათვალი გამოაქვეყნა, რომლებმაც ვაქცინირებული ტურისტებისთვის შეზღუდვები მოხსნეს. მათ შორისაა საქართველო, კვიპროსი, ესტონეთი, ისლანდია, პოლონეთი, რუმინეთი და სეიშელი.
”ევროპისა და აზიის გზაჯვარედინზე მდებარე საქართველომ სრულად ვაქცნირებული მოგზაურებისთვის შეზღუდვები მოხსნა. საქართველოს საგარეო საქმეთა სამინისტრომ ახლახანს გამოაცხადა, რომ ნებისმიერი ვიზიტორი ვინც Covid-19-ის საწინააღმდეგო ვაქცინის ორ დოზას მიიღებს PCR-ტესტის ნეგატიური პასუხის წარდგენის გარეშე საქართველოში საჰაერო გზით ჩასვლას და მოგზაურობას შეძლებს.
არავაქცინირებულ მოგზაურებს კი გარკვეული ქვეყნებიდან 72 საათის განმავლობაში ჩატარებული PCR-ტესტის ნეგატიური პასუხის შემდეგ შეეძლებათ ქვეყნის საზღვრის გადაკვეთა, მაგრამ მესამე დღეს საკუთარი ხარჯით მოუწევთ კიდევ ერთხელ ტესტის გავლა“,- წერს CNN-ის ჟურნალისტი თამარა-ჰარდინჰენ-ჰილი და აღნიშნავს, რომ ის მოგზაურები, რომლებიც ბოლო 14 დღე დიდ ბრიტანეთში იმყოფებოდნენ, საქართველოში ჩასვლის შემთხვევაში სავალდებულო 12 დღიან კარანტინს გაივლიან.
”ძალიან მნიშვნელოვანია, რომ მსოფლიოში ერთ-ერთი უდიდესი მედია პლატფორმა CNN ეხმაურება საქართველოს ხელისუფლების გადაწყვეტილებას საერთაშორისო ვიზიტორთათვის საჰაერო გზით ქვეყნის გახსნის შესახებ და სამოგზაურო პორტალზე CNN travel მილიონობით მკითხველს ინფორმაციას აწვდის თუ რა პირობით შეძლებენ ტურისტების საქართველოში ჩამოსვლას. როგორც იცით მთავრობის საკოორდინაციო საბჭოს გადაწყვეტილებით, მოიხსნა შეზღუდვა ფრენებზე და საქართველო საჰაერო გზით უპირობოდ მასპინძლობს ყველა ქვეყნის მოქალაქეს, რომელიც წარმოადგენს კოვიდ ვაქცინის სრული კურსის ჩატარების დამადასტურებელ დოკუმენტს. ამასთან, გარკვეული ქვეყნების მოქალაქეებს საქართველოში შემოსვლა შეუძლიათ ბოლო 72 სთ-ში ჩატარებული ნეგატიური PCR ტესტის საფუძველზე",- განაცხადა ტურიზმის ეროვნული ადმინისტრაციის ხელმძღვანელის მოვალეობის შემსრულებელმა მედეა ჯანიშვილმა.
