ტრენინგ ცენტრების, კონფერენციებისა და სემინარებისათვის უსაფრთხოების დასაცავი და ვირუსის გავრცელების მიმართ პრევენციული ღონისძიების რეკომენდაციები შემუშავდა. წესები, რომელიც მსგავსი შეკრების ორგანიზატორებმა უნდა გაითვალისწინონ, ჯანდაცვის სამინისტროს ვებ-გვერდზე გამოქვეყნდა:
ერთიან შესასვლელთან განახორციელეთ თერმოსკრინინგი სპეციალური ვიდეოდანადგარის ან დისტანციური თერმომეტრის საშუალებით, რათა გააკონტროლოთ როგორც ადმინისტრაციის თანამშრომელთა, ასევე მსმენელთა ჯანმრთელობის მდგომარეობა ტემპერატურის გაზომვით;
გარდა ამისა, ზოგადი რეკომენდაციები მოიცავს დეზობარიერების განთავსებას, პერსონალისა და სტუმრების ინფორმირებულობას, სადეზინფექციო ხსნარების განთავსებას. ინდივიდუალური დაცვის საშუალებების გამოყენებას და ა.შ;
„სასწავლო/ტრენინგ ცენტრის ადმინისტრაციისათვის საოფისე სივრცეში ავეჯი ისე განალაგეთ, რომ დაცული იყოს უსაფრთხო დისტანცია; აუდიტორიებში/სატრენინგო დარბაზებში განათავსეთ ზედაპირების სადეზინფექციო საშუალებები და მიუთითეთ მათი სწორად მოხმარების წესები; გამოყავით პირები, რომლებიც პერიოდულად დაასუფთავებენ ხშირად შეხებად ზედაპირებს შესაბამისი კონცენტრაციის სადეზინფექციო ხსნარით; აუდიტორიები, დარბაზები, ოფისები და საერთო სარგებლობის ფართები აღჭურვეთ გამოყენებული ერთჯერადი ხელსახოცებისა თუ სხვა ჰიგიენური ნარჩენებისთვის დახურული კონტეინერებით, რომლებშიც ჩაფენილი იქნება ერთჯერადი პოლიეთილენის პარკი. ნარჩენების პარკი ამოიღეთ და განკარგეთ ერთჯერადი ხელთათმანების 2 გამოყენებით. უზრუნველყავით ასეთი ნარჩენების დროული გატანა შესაბამისი პირის/სამსახურის მიერ; სასწავლო/სატრენინგო პროცესის, დაწყებამდე და დასრულების შემდგომ, ლეპტოპები დაამუშავეთ სპეციალური სადეზინფექციო ხსნარში დასველებული ერთჯერადი ხელსახოცებით“, – აღნიშნულია დოკუმენტში.
ჯანდაცვის სამინისტროს ინფორმაციით, დაუშვებელია ნივთების გაცვლა დეზინფექციის გარეშე.
„უზრუნველყავით გამოყენებული ფართის ყოველ 5მ2 ერთი ადამიანის დაშვება; აუდიტორიაში/დარბაზში უზრუნველყავით უსაფრთხო დისტანციის დაცვა; დისტანციის დაცვის შეუძლებლობის შემთხვევაში, მსმენელი/პერსონალი უნდა აღიჭურვოს ნიღბებით; არ დაუშვათ მსმენელების განთავსება ერთმანეთის პირისპირ; ჯგუფური ვარჯიშების/მეცადინეობის/სწავლების ან პრეზენტაციის დროს, იმ შემთხვევაში თუ ვერ ხერხდება შესაბამისი დისტანციის დაცვა, გამოიყენეთ სახის დამცავი ფარი“, – ნათქვამია სამინისტროს მიერ გამოქვეყნებულ რეკომენდაციებში.
ამასთან, როგორც დოკუმენტშია აღნიშნული, უზრუნველყოფილი უნდა იყოს ბუნებრივი უსაფრთხო ვენტილაცია გარედან შემოსული ჰაერით და შესაბამისი წესების დაცვით უნდა მოხდეს აუდიტორიების/დარბაზებისა და საგამოცდო/ტესტირების სივრცის დალაგება.