გორის მუნიციპალიტეტის სოფელ ზერტში შუა ხნის ქალი, სავარაუდოდ, ბუნებრივი აირის ნამწვით გარდაიცვალა. ის უგონო მდგომარეობაში საკუთარი სახლში, სააბაზანოში იპოვეს. ადგილზე მისულ სასწრაფო დახმარების ბრიგადას პაციენტი უკვე გარდაცვლილი დახვდა.
როგორც შსს-ში განაცხადეს, მომხდარზე გამოძიება სსკ-ის 240-ე პრიმა მუხლის მე-2 ნაწილით მიმდინარეობს, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს, რასაც მოჰყვა ადამიანის სიცოცხლის მოსპობა ან სხვა მძიმე შედეგი.