"მარტო ჩვენ რომ მიგვიწიოს მუშაობა, ყველაფერს გავაკეთებთ იმისთვის, რომ ჩვენი ქალაქი იყოს სუფთა, მოწესრიგებული, თუმცა გარწმუნებთ, რომ მარტოს არ მოგვიწევს ამის გაკეთება, ძალიან ბევრნი ვართ, ვინც დადგება იქ, სადაც ჩვენს ქალაქს სჭირდება", - თბილისის მერმა კახა კალაძემ დასუფთავების პროცესში თავად მიიღო მონაწილეობა. მან "თბილსერვის" ჯგუფის თანამშრომლების გაფიცვას პროვოკაცია უწოდა და თქვა, რომ ცალკეული პირები მიზანმიმართულად ავრცელებენ ჭორებს და აბუნტებენ ადამიანებს.
დედაქალაქის მერმა განაცხადა, რომ დასუფთავებაზე პასუხისმგებელ თანამშრომლებს ხელფასები გასულ წელს 20%-ით მოუმატეს. ორი წლის წინ შეიცვალა ავტომობილები და ტექნიკაც; მან ყურადღება თანამშრომლების სამუშაო ფორმებზეც გაამახვილა და თქვა, რომ ტენდერი ჩატარებულია და თითოეული თანამშრომელი უახლოეს პერიოდში 2-3 წყვილ სამუშაო ფორმას მიიღებს.
