ცნობილი ქართველი მეცო-სოპრანო, ანიტა რაჭველიშვილი იუსტიციის მინისტრის, თეა წულუკიანის მიერ ხელმოწერილ ბრძანებას ეხმაურება, რომლის თანახმადაც, თუ ქორწინებიდან 1 წელი არ არის გასული, ქალი ინ ვიტრო (ხელოვნურ) განაყოფიერებას ვერ შეძლებს
"ეს უბრალოდ გულის ამრევია! დისკრიმინაცია და სხვისი ცხოვრებით თამაშია! ეს “ქალბატონი” კარგი იქნებოდა ადამიანების უფლებების დარღვევისთვის გისოსებს მიღმა აღმოჩენილიყო!" - წერს რაჭველიშვილი.
ცნობისთვის, ცნობისთვის, იუსტიციის მინისტრმა 25 აგვისტოს ბრძანებას მოაწერა ხელი. სამოქალაქო აქტების რეგისტრაციის წესში ცვლილებები 2020 წლის 1-ლი სექტემბრიდან ამოქმედდება.
ცვლილებების თანახმად, განაყოფიერებამდე ნოტარიულად დადებული ხელშეკრულების მხარე შეიძლება იყოს “ქალისა და მამაკაცისგან შემდგარი წყვილი, რომლის მიზანსაც წარმოადგენს ექსტრაკორპორული გზით დაბადებული ბავშვის აღზრდა” იმ შემთხვევაში, თუ ისინი:
- იმყოფებიან ქორწინებაში და ქორწინებიდან გასულია სულ მცირე, 1 წელი;
- იმყოფებიან ფაქტობრივ თანაცხოვრებაში, სულ მცირე, უკანასკნელი 1 წლის განმავლობაში. ქალისა და მამაკაცის ფაქტობრივ თანაცხოვრებაში ყოფნის ფაქტი ნოტარიუსის წინაშე უნდა დადასტურდეს შესაბამისი დოკუმენტებით.
მინისტრის ბრძანება ასევე გააკრიტიკა სუროგაციის ცენტრის მსოფლიო ქსელის დამფუძნებელმა, მარიამ კუკუნაშვილმა.
ფაქტთან დაკავშირებით განცხადება გაავრცელა იუსტიციის სამინისტრომ და განმარტა, რომ საქართველოს იუსტიციის სამინისტრო, სხვა კომპეტენტურ უწყებებთან ერთად, იღებს რეგულაციებს და ყველაფერს აკეთებს იმისათვის, რომ არ დაუშვას ჩვენი ქვეყნის ტერიტორიაზე ჩვილებით ვაჭრობის დანაშაულის ჩადენა და ამასთანავე მოახდინოს პრევენცია იმისა, რომ საქართველოდან გაყვანილი სუროგაციით დაბადებული ბავშვი წამების, არაადამიანური მოპყრობის ან სექსუალური ექსპლუატაციის მსხვერპლი არ გახდეს. მათი განმარტებით, სწორედ აღნიშნულის პრევენციას ემსახურება ფაქტი, რომ N18 ბრძანებაში განხორციელდა ცვლილება, რომლითაც საქართველოში სუროგაციის გზით ბავშვის გაჩენის შესახებ ნოტარიუსის წინაშე გასაფორმებელი ხელშეკრულების თავისებურებები მორიგჯერ დაზუსტდა.
აღნიშნულ საკითხთან დაკავშირებით კომენტარი გააკეთა თავად მინისტრმა, თეა წულუკიანმა და განმარტა, რომ არავითარი ახალი წესი ხელოვნური განაყოფიერების პროცესში არ შემოდის. მისი თქმით, ახალი რეგულაცია შეეხება სუროგაციის სერვისით მოსარგებლე წყვილებს და ამიერიდან მათ თანაცხოვრების ნამდვილობის დადასტურება მოუწევთ.