სამაუწყებლო კომპანია "რუსთავი 2-ის" ჟურნალისტი და წამყვანი თეონა ცხომელიძე, რომელსაც ერთი კვირის წინ კორონავირუსი დაუდასტურდა, სოციალურ ქსელში წერს, რომ ძლიერი ხველა აქვს, ხოლო გემოსა და ყნოსვის შეგრძნება ჯერ არ დაბრუნებია. გარდა ამისა, კვლავ აქვს ზურგის ძლიერი ტკივილი.
მისივე თქმით, აღნიშნული სიმპტომების მიუხედავად, ის მსუბუქ პაციენტად ითვლება.
"#კოვიდინფიცირებული დღე 7
ორი დღეა პლაქვენილი აღარ მიმიღია, მარტო ინჰალაცია და სისხლის გამათხელებელი, რომელსაც საღამოობით მიკეთებენ. ყნოსვა და გემო ისევ არ მაქვს, მცდელობასაც გავეშვი, ყველა ექსპერიმენტი უშედეგოდ მთავრდება, ვერაფერს ვგრძნობ. მთელი ცხოვრების ოცნება ამიხდა - სულ ერთია რას ვჭამ, შესაბამისად არ გავსუქდები. კორონა რომ გაქვს და წონაზე ღელავ ე.ი. ყველაფერი არც ისე ცუდადაა.
ისევ ფრთხილად ვსუნთქავ, ერთი კარგი ამოსუნთქვა და ხველა მახრჩობს. როგორც ექიმმა ამიხსნა ხველა ორგანიზმის დამცავი მექანიზმია და მის მკურნალობას ჯობია უბრალოდ გავუძლო, თუ რა თქმა უნდა ძალიან არ ვიტანჯები. არ ვიტანჯები, შესაბამისად წამალს არ ვსვამ. ზურგი ისევ მტკივა, მტკივა კი არა, მკლავს. ფეხები ისე აღარ. გუშინ პირველი ღამე იყო გამაყუჩებლის გარეშე, მეძინათქო ხმამაღალი ნათქვამია 'მივდი-მოვდიოდი. გამაყუჩებელი კოვიდ 19სას რეკომენდირებული არ არის.
მე ხომ თითქოს მხნედ ვარ?! მაგრამ არ გეგონით რომ ესაა კორონას ნამდვილი სახე. ნამდვილია რეანიმაცია, იქ ადამიანები გონზე ვერ მოყავთ და მიზეზი ზუსტად ის ინფექციაა რაც ახლა ჩემა სხეულშია. ამიტომ ნუ
იფიქრებთ რომ არაფერია, გაიკეთეთ პირვადე და დაიცავით წესები. რთული ხომ არაა? აქ გაძლებაა რთული.
ჩვენი პალატის კარს ვუყურებ, წარმომივიდგენ ხოლმე როგორ ვაღებ და გავდივარ სამუდამოდ. მსუბუქი პაციენტი ვარ და როგორ დავიწუწუნო, მაგრამ ყველაზე მეტად ამ გამოკეტილობაზე მინდა წუწუნი.
ნინო ყოველ დღე ესაუბრება თავისი კლასტერისებს, რამდენიმე აუცილებელი ვიდეო ხიდი უნდა შედგეს კლინიკიდან და კარანტინიდან. ერთი მიყვარს განსაკუთრებით - ნანუკა, 17 წლის, მგონი ინფექციურშია. რომ დარეკავს დიდი მხიარულებაა. გუშინ ვიდეო თვალით თავისი მედდა გვაჩვენა, უკიდურესად გადაფუთული, ჩვენი ლალი ეგრე ჩაცმული არ მოძრაობს. ნინო ეუბნება - მაგათ ისე აცვიათ, თქვენ მგონი მართლა კორონა გაქვთო - სართულს ესმოდა ჩვენი სიცილი.
მედდა ლალი მარტო აღარ არის, მედძმა დაემატა. კლინიკებზე ვსაუბრობდით, რომელი კარგია, რომელი ნაკლებად. ჩვენო, რეანიმაცია ყველაზე კარგი და გადასარევი გვაქვსო, შევთანხმდით რომ სიტყვაზე ვენდობით" - წერს ჟურნალისი.
