დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, საქართველოში ყოველდღიურად კორონავირუსის 9-10 ათასი ტესტი ტარდება.
მისივე განმარტებით, ეპიდემიის ამ მასშტაბებისთვის ეს სრულად საკმარისია და ამ მიმართულებით ქვეყანაში პრობლემა არ არსებობს.
"გვაქვს კარგი მაჩვენებელი ტესტირებაში. 1 მილიონ მოსახლეზე გვაქვს 213 000-დან 214 000-მდე საერთო ტესტირების მაჩვენებელი. ყოველდღიური გვაქვს 9-10 ათასის ფარგლებში, რაც ეპიდემიის ამ მასშტაბებისთვის კარგია, მაგრამ ნუ მივეცემით ნურც პანიკას ერთის მხრივ და ნურც დამშვიდებას", - განაცხადა გამყრელიძემ.
ცნობისთვის, გასული დღე-ღამის განმავლობაში საქართველოში კორონავირუსის 1,759 ახალი შემთხვევა გამოვლინდა.
გამოჯანმრთელდა 350 პაციენტი და გარდაიცვალა 5.
