ქუთაისის #2 საპყრობილეში პატიმარი უკვე 51-ე დღეა პროტესტის ნიშნად შიმშილობს, რის გამოც, მისი ჯანმრთელობის მდგომარეობა მძიმეა.
"კრიტიკული მდგომარეობაა, უარს ამბობს სამედიცინო დახმარებაზე, იქამდე იშიმშილებს ვიდრე შინაგან საქმეთა სამინისტროს წარმომადგენლები მისი საქმით არ დაინტერესდებიან", - განმარტავს პატიმრის ადვოკატი ილია ჯანელიძე.
პატიმრის საქმით სახალხო დამცველის აპარატი დაინტერესდა. ომბუდსმენის წარმომადგენლის თქმით, პატიმართან პერიოდულად შედიან და მის საქმეს სწავლობენ.
აღნიშნული პიროვნება 2 ოქტომბერს დააკავეს. ის დაკავების დღიდან შიმშილობს. მას ბრალი წარდგენილი აქვს საქართველოს სისხლის სამართლის კოდექსის 260-ე მუხლით, რაც ნარკოტიკების უკანონოდ შეძენა-შენახვას გულისხმობს. ბრალდებულის თქმით კი მას ნარკოტიკი პოლიციამ ჩაუდო.
პატიმრის შიმშილობის ფაქტი report.ge-ის სპეციალურ პენიტენციურ სამსახურში დაუდასტურეს და განმარტეს, რომ საჭიროების შემთხვევაში, პატიმარი უზრუნველყოფილი იქნება შესაბამისი სამედიცინო მომსახურებით.