საქართველოში კორონავირუსით კიდევ ერთი, 41-ე პაციენტი გარდაიცვალა. აჭარის ჯანდაცვის სამინისტროს ინფორმაციით, გარდაცვლილი პაციენტი 82 წლის კაცია, რომელიც 29 სექტემბრიდან ბათუმის რესპუბლიკურ საავადმყოფოში მკურნალობდა.
პაციენტის შესახებ უწყება დამატებით ინფორმაციას ავრცელებს.
,,დიაგნოზი: COVID -19, სუნთქვის უკმარისობა, ფილტვის შეშუპება, ორმხრივი ტოტალური პნევმონია. თანმხლები დაავადება: გულის მწვავე უკმარისობა. კლინიკაში გატარდა ყველა შესაბამისი ღონისძიება, თუმცა, დაავადებების სირთულიდან გამომდინარე, სამწუხაროდ, პაციენტის გადარჩენა ვერ მოხერხდა. პაციენტი გარდაიცვალა 1-ელ ოქტომბერს", - აცხადებენ ჯანდაცვის სამინისტროში.
ცნობისთვის, დღეს საქართველოში კორონავირუსით გარდაიცვალა 81 წლის კაციც.
საქართველოში კორონავირუსის 448 ახალი შემთხვევა გამოვლინდა და ინფიცირებულთა რაოდენობა 6640-მდე გაიზარდა.
გამოჯანმრთელდა 299 პაციენტი და საერთო რაოდენობა 3 419-ს შეადგენს.
