დაავადებათა კონტროლის ცენტრის დირექტორის მოადგილე, პაატა იმნაძე ვაქცინაციის მსურველებს აფრთხილებს.
მისი თქმით, აცრამდე არავითარი ანალიზის ჩატარება საჭირო არ არის.
"არავითარი წინასწარი მომზადება და ანალიზი აცრას არ სჭირდება. არ არსებობს ანალიზი, რომლის მიხედვითაც ექიმი გეტყვის, რომ ახლა შენი აცრა შეიძლება და ახლა არ შეიძლება. ეგეთი ანალიზი ბუნებაში არ არსებობს. მაპატიონ ჩემმა კოლეგებმა, მაგრამ ეს არის ცუდი სარეკლამო ტრიუკი. არავითარი წინასწარი მომზადება არ სჭირდება. სხვათა შორის, არც წამლების შეწყვეტა საჭირო არ არის", - განაცხადა პაატა იმნაძემ "პალიტრანიუსის" ეთერში.
