თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, კორონავირუსის 8 ახალი დადასტურებული შემთხვევიდან 1 ბოლნისის კლასტერს უკავშირდება, ხოლო 7 პაციენტს ვირუსი საკარანტინო სივრცეებში ჩატარებული ტესტირების შედეგად დაუდასტურდა.
ეზუგბაიას ინფორმაციით, ქვეყანაში ვირუსისგან გამოჯანმრთელებულთა რაოდენობა 249 შემთხვევით აჭარბებს ინფიცირებულთა რაოდენობას.
"გუშინდელი მონაცემებით გვყავდა 713 დადასტურებული შემთხვევა და დღეს მხოლოდ 8 ახალი შემთხვევა დადასტურდა. შესაბამისად გვაქვს ინფიცირების 721 შემთხვევა. გამოჯანმრთელებულების რიცხვი 10-თ გაიზარდა, გვყავდა 475 გამოჯანმრთელებული და დღეს გვყავს - 485.
ამ ეტაპზე კოვიდსტაციონარებში მკურნალობს 224 პაციენტი. გამოჯანმრთელებულთა როადენობა კვლავ აჭარბებს სტაციონარებში მკურნალობაზე მყოფთა რაოდენობას 249 შემთხვევით.
ახალი დადასტურებული 8 შემთხვევიდან, ერთის წყარო არის ბოლნისი. დანარჩენი 7 არის საკარანტინო ზონიდან, იქ ჩატარებული ტესტირების შედეგად დადასტურებულები" - განაცხადა მარინა ეზუგბაიამ.
შეგახსენებთ, საქართველოში კორონავირუსის 721 შემთხვევაა დადასტურებული. გამოჯანმრთელდა 485 ადამიანი. გარდაცვლილია 12 პაციენტი. კარანტინის რეჟიმში იმყოფება 3519 მოქალაქე, ხოლო სტაციონარში მეთვალყურეობის ქვეშ - 351. უცხოეთიდან სამკურნალოდ გადმოყვანილია საქართველოს 3 მოქალაქე.
