მესტიის მუნიციპალიტეტში 2 სექტემბრიდან საკარანტინო შეზღუდვები სრულად იხსნება და რეგიონი ცხოვრების ჩვეულ რეჟიმს უბრუნდება, - ამის შესახებ სამეგრელო-ზემო სვანეთის გუბერნატორის მოადგილემ ნინო ვიბლიანმა განაცხადა.
მისი თქმით, მუნიციპალიტეტში ჩატარდა 5 000-მდე PCR კვლევა, აქედან 1 500 იყო მეორადი ტესტირება.
„ბოლო დღეების განმავლობაში დაბა მესტიასა და ლენჯერში ვირუსის დამახასიათებელი ნიშნები არ გამოვლენილა. შეზღუდვების მოხსნის მიუხედავად მასიური თერმოსკრინინგი სოფლებში გაგრძელდება, ხოლო „პისიარ“ კვლევა ჩატარდება გეგმურად“, - განაცხადა ნინო ვიბლიანმა.
შეგახსენებთ, კორონავირუსის ახალი დადასტურებული შემთხვევების გამო, მესტიაში, უშგულსა და ლენჯერში შესვლა და გამოსვლა 10 აგვისტოდან შეიზღუდა.