მოქალაქე ივიკო ფრუიძე Facebook-ზე ვრცელ პოსტს აქვეყნებს და აცხადებს, რომ თბილისში, პეკინის ქუჩაზე მდებარე Skygirls Bar-ის დაცვამ სცემა, ხელი მოტეხა და ცხვირი გაუტეხეს.
მისივე თქმით, ფიზიკური შეურაცხყოფის გარდა, ის აღნიშნულ ბარში, თაღლითობის მსხვერპლიც გახდა.
"პარასკევს საღამოს ტრადიციულად მეგობრებთან ერთად ვატარებდი შესანიშნავ დროს, როცა ჩემს მეგობარს, მეზობელ მაგიდასთან მჯდომი გოგონა მოეწონა, გაიცნო და იქითკენ გადაჯდა. შემდეგ მათგან გაჩნდა იდეა, რომ ადგილი შეგვენაცვლებინა და სხვა ბარში წავსულიყავით. ჩემი მეგობარი სულ 4 დღის ჩამოსული იყო (კარანტინი გავლილი ჰქონდა). როგორც სტუმარი მარტო არ დავტოვეთ და წავყევით სხვა ჩვენთვის უცნობ ბარში სადაც:
სიტუაციით დიდად არ ავღფრთოვანდით: თითქმის არავინ იყო ჩვენს გარდა, არც მუსიკამ მოგვხიბლა, არც - გარემომ. გარკვეული დროის შემდეგ დავაპირეთ სახლში დაბრუნება და მოვითხოვეთ ანგარიში.
თუმცა მოგვიტანეს სრულიად აბსურდული ანგარიში, ჩვენს მიერ შეკვეთილი ხუთი კოქტეილის ნაცვლად ანგარიშში ოცხდახუთი ეწერა. თან მომსახურების პროცენტის გარდა, კალკულაციაში კიდევ იყო დამატებული გაურკვეველი სოლიდური თანხა, რომლის წარმომავლობაც ვერ დავადგინეთ.
თავიდან მომსახურე პერსონალს ვუთხარი, ალბათ რაღაც შეცდომაა ეს ჩვენი ანგარიში არ არის-მეთქი. არაო თქვენიაო, თქვენს მეგობართან, რომ გოგოა იმან შეუკვეთაო. ვკითხე ყველას და გაურკვეველი შეკვეთები არცერთ ჩემს მეგობართან არ ყოფილა შეთანხმებული. მივხვდი, რომ თაღლითური სქემით მუშაობდა ბარი, რაზეც გამოვხატე ჩემი ღია პროტესტი თითოეულ თანამშრომელთან, ღიად დავადანაშაულე ისინი თაღლითობასა და უღირს ქცევაში, პრინციპული უარი განვაცხადე თანხის გადახდაზე და მოვითხოვე კამერების ამოღება. რის შემდეგაც მოვიდა დაცვა, გამიყვანა გარეთ და გამომკითხა, თუ რატომ ვიყავი უკმაყოფილო და რატომ ვამბობდი უარს ანგარიშის გადახდაზე? სრულიად რაციონალურად ავუხსენი დაცვას ჩემი აღშფოთების მიზეზი, თუმცა ამასობაში ჩემმა ძმაკაცმა მაინც გადაწყვიტა, რომ ანგარიში გადაეხადა, შებრუნდა ბარში და გადაიხადა თაღლითურად შედგენილი ანგარიში იმ მოტივით, რომ უხერხული ინციდენტი ამოწურულიყო. ტერმინალით რა თქმა უნდა არ გადაახდევინეს, ჩეკიც მოითხოვა და არ მისცეს (ასე იციან თაღლითებმა) მე კი დავრჩი გარეთ დაცვასთან სრულიად წყნარ სიტუაციაში და ეხლა ხდება საოცრება: დაცვის ერთერთი წევრი მეუბნება, რომ ვითომ ჩემი ბარში შებრუნებული ძმაკაცი მეძახის. რის შემდეგაც შევდივარ ბარში და მხვდება 5 დაცვის წევრის და ერთი მომუშავე პერსონალის ჩასაფრება. სულ ექვსი ადამიანის. მოვექეცი მათ ალყაში და დამიწყეს ცემა.
რათქმაუნდა გავუწიე წინააღმდეგობა, მაგრამ რამდენს გავუძლებდი?! ჩემზე ორჯერ დიდები იყვნენ... წამაქციეს, მირტყამდნენ უმოწყალოდ, არ მაძლევდნენ ფეხზე წამოდგომის საშუალებას. ყოველ წამს მხვდებოდა უამრავი მუშტი თუ წიხლი სხვადასხვა მიმართულებიდან. მათ შორის განსაკუთრებული აგრესიულობით გამოირჩეოდა ბარის ერთერთი თანამშრომელი გოგო, რომელიც დაცვის წევრების მიერ დაგდებულს მირტყამდა სკამს. ამ გოგოსთან დავაფიქსირე პირველი ლოგიკური პროტესტი არარეალურ ანგარიშზე. ამ ყველაფერს შეესწრო ჩემი ძმაკაცი, რომელიც დამეხმარა ჩასაფრებიდან გამოღწევაში. თუმცა ისტორია გრძელდება:
ამოვედი ბარიდან ნაცემი, აღშფოთებული, ემოციურად ძალიან რთულ მდგომარეობაში და რათქმაუნდა დავრეკე პატრულში. ეკიპაჟის მოსვლამდე მოხდა ჩემსა და დაცვას შორის მორიგი შელაპარაკება. დავადანაშაულე ისინი ნაძირალა სისტემის სამსახურში და დანაშაულებრივ ქმედებაში. ამ დროს ერთერთი დაცვის წევრი გვერდიდან მირტყამს სახეში, სანამ იმას შევუტრიალდი მეორე მირტყამს მეორე გვერდიდან და ა.შ. მოკლედ კვლავ დამაგდეს და მირტყამდნენ უმოწყალოდ სახესა და თავში ყველა მხრიდან.
მირტყამდნენ ისეთი გამეტებით, რომ სახეზე აფარებული ხელი მომტყდა. გადამეფარა ჩემი ძმაკაცი, შველას ცდილობდა სტუმარი მეგობარიც, რომელთაც რამოდენიმე დარტყმისგან მიხსნეს. ისინი რომ არ ყოფილიყვნენ ან გადავრჩებოდი ან - არა. რაღაც მომენტში ვიფიქრე, რომ გარდარჩენის შანსი თითქმის აღარ მქონდა, რადგან მირტყამდნენ კუნთის უზარმაზარი მასები, იყვნენ ბევრნი და სრულიად დაუნდობლები. როგორღაც მიხსნეს მეგობრებმა მათგან და ამასობაში პატრულიც მოვიდა.
დაცვის 5 წევრიდან და ერთი ბარის პერსონალიდან 2 დაცვის წევრი დარჩა ადგილზე (დანარჩენი 4 მოძალადე გადაიმალა) დარჩენილებს რათქმაუნდა ხელი დავადე, როგორც ამ ბოროტების თანაავტორებს და იმედი მაქვს, რომ წარსდგებიან მართლმსაჯულების წინაშე.
სრულიად უდანაშაულო ადამიანი დავრჩი ჯერ თაღლითობის მსხვერპლი, შემდეგ ხელ და ცხვირგატეხილი, უამრავი ტრამვით. ერთი ოპერაცია უკვე ჩამიტარდა, წინ მაქვს მეორე. მაქვს ტვინის შერყევა. ვარ დაჟეჟილობით სხეულის ყველა წერტილში. არ ვითვლი მცირე ჭრილობებსა და ნაკაწრებს. რამოდენიმე თვით გამოვეთიშე ცხოვრების ჩვეულ რიტმს, მხოლოდ იმიტომ, რომ ვერ გადავყლაპე შეურაცხყოფა და ღიად ვამხილე თაღლითები.
ჯერჯერობით უცნობია ჩემთვის დაცვის დანარჩენი 3 წევრის ბედი, ისევე როგორც ბარის პერსონალის, რომელიც დაგდებულს მირტყამდა სკამს. ამოღებულია კამერები, იდენთიფიცირებულია, რომ ისინი იყვნენ ექვსნი. დიდი იმედი მაქვს, რომ თითოეულ მათგანს მოუწევს პასუხისგება სამართლისა და კანონის წინაშე.
ვითანამშრომლებ გამოძიებასთან, ტელევიზიებთან. გავაკეთებ ყველაფერს, რომ სხვა ჩემნაირმა ადამიანმა (ქართველმა თუ უცხოელმა) არ გაიზიაროს იგივე ბედი ჩვენს ქვეყანაში. ძალიან დიდი იმედი მაქვს, რომ ამ ფაქტს საგამოძიებო სტრუქტერებიდან მოჰყვება ადექვატურად მკაცრი რეაგირება და სამართალი იქნება დაფასებული. აქვე მინდა მადლობა გადავუხადო ჩემს ადვოკატს, რომან ნადირაძეს, რომელმაც ღირსეული შრომა გასწია და ვფიქრობ, რომ მომავალშიც გასწევს.
ბარი არის პეკინის 3 - ში, Skygirls Bar ჰქვია (როცა გამოვედი სახელს მერე დავაკვირდი, მაგრამ შიგნით თითქოს უჩვეულო არაფერი ხდებოდა). როგორც გავარკვიე, ავლაბარში არსებული Sky Bar - იც ზუსტად იგივე სქემით მუშაობს და სავარაუდოდ საერთო მენეჯმენტის დაქვემდებარებაშია ორივე. ამოიღონ კამერები, თუ რა ხდებოდა ბარში და მის გარეთ. მე არაფერი დასამალი არ მაქვს და არც რამის მეშინია. აუცილებლად მოგაწვდით ინფორმაციას მომავალში განვითარებული მოვლენების შესახებ. იმედი მაქვს, რომ სამართლი დადგება და ცოტა უფრო დაცულად ვიგრძნობთ თავს ჩვენს ქვეყანაში...
რომ ვყოფილიყავი ჩუმად და გადამეხადა აბსურდული ანგარიში - ამცდებოდა ამხელა შეურაცხყოფა თუ მატერიალური ზარალი (ოპერაციები საკმაოდ ძვირი ჯდება) მაგრამ ვერ და არ შევძელი ამხელა უსამართლობასთან შეგუება. თუ ამ ფაქტს მოჰყვება ისეთი რეაგირება, რომ სხვა ჩემნაირს ჰქონდეს მეტი სიმშვიდე - გაღებულ მსხვერპლს გამართლებულად ჩავთვლი...
მე ჩემს ღირსებას დავიცავ კანონისმიერად, მაგრამ რა მოუვათ სხვებს? ფაქტია, რომ საქართველოში არსებობს 10 - 15 ბარი, სადაც იდენტური სქემით ხდება ხალხის გამწარება ყოველდღიურად. მე თვითონ მივაწვდი ასეთი ბარების სიას დაინტერესებულ პირებს. ათიათასობით ადამიანი აღმოჩენილა მსგავს უსამართლობაში. ზოგი უცხოელია და არ იცნობს ჩვენს კანონმდებლობას, ზოგს ადვოკატის აყვანის რესურსი არ აქვს, ზოგი კომპრომატდება, ზოგი მშიშარაა, ზოგი უბრალოდ მარტივად ჰყლაპავს შეურაცხყოფას და ა.შ. მთავრობა კი რას ფიქრობს არ ვიცი. უამრავი პირი, განსაკუთრებით უცხოელები, არიან ასეთი ტიპის თაღლითობის მსხვერპლნი და ჩვენს ქვეყანაზე გულაცრუებულნი, რაც ძალიან გვარცხვენს საერთაშორისო ასპარეზზე.
მიმაჩნია, რომ მთავრობის მხრიდან აუცილებლად უნდა გადაიდგას პრევენციული ნაბიჯები, რათა საქართველოში ადამიანი იყოს უფრო დაცული. სისტემა უნდა იცავდეს მოქალაქეს და არა ცალკეული ადამიანების მარიფათი. ამისთვის მხოლოდ ნებაა საჭირო. განა ვინ მფარველობს ესეთ ბარებს, რომ ესეთ სიტუაციაში აგდებენ ხალხს და გასდით?!
უამრავი შემთხვევა გავიგე, რომ ჩემი ნაცნობი ადამიანები აღმოჩენილან მსგავს სიტუაციაში. უამრავი სტატიაც წავიკითხე ამ თემაზე, მაგრამ საკითხის გადაჭრის პოლიტიკური ნება ჯერჯერობით არ არსებობს და ეს დაუცველს ჰხდის თითოეულ ადამიანს. გავაკეთებ მაქსიმუმს, რომ ჩემი შემთხვევა იყოს უკანასკნელი," - წერს ივიკო ფრუიძე Facebook-ზე.
