დაავადებათა კონტროლის ეროვნული ცენტრი COVID-19-ით ინფიცირებულთან კონტაქტში მყოფი პირებისთვის რეკომენდაციებს აქვეყნებს:
„დარჩით თვითიზოლაციაში ბოლო კონტაქტიდან 12 დღის განმავლობაში;
ამ პერიოდში არ წახვიდეთ სკოლაში; სამსახურში, საყიდლებზე;
არ იმგზავროთ საზოგადოებრივი ტრანსპორტით; არ მიიღოთ სტუმრები;
თუ ოჯახის წევრებთან ერთად ცხოვრობთ, მინიმუმადე დაიყვანეთ საერთო სივრცეებში მათთან შეხვედრა;
თუ ოჯახის წევრებთან შეხვედრა გარდაუვალია, გამოიყენეთ პირბადე და დაიცავით უსაფრთხო დისტანცია - სულ მცირე ერთი მეტრი;
გაიზომეთ ტემპერატურა დღეში ორჯერ;
COVID-19-სთვის დამახასიათებელი ნებისმიერი სიმპტომის შემთხვევაში (ცხელება, ხველება, სუნთქვის გაძნელება) დაუყოვნებლივ დაუკავშირდით 112-ს ან, ოჯახის ექიმს“, - აღნიშნულია რეკომენდაციებში.
ცნობისთვის, ბოლო 24 საათის მონაცემებით, კორონავირუსის 887 ახალი შემთხვევა გამოვლინდა და ინფიცირებულთა რაოდენობა 15 327-მდე გაიზარდა.
გამოჯანმრთელდა 246 პაციენტი და საერთო რაოდენობა 7 613-ს შეადგენს.
საქართველოში კორონავირუსით კიდევ 11 ადამიანი გარდაიცვალა. სულ გარდაცვლილთა რაოდენობა 124-ს შეადგენს.
