თავში

ოჯახურ დავებში მედიაცია ერთვება

ოჯახურ დავებში მედიაცია ერთვება

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოსა და საქართველოს მედიატორთა ასოციაციას შორის მემორანდუმი გაფორმდა. მისი მიზანია, მედიაციის, როგორც დავის გადაწყვეტის ალტერნატიული მექანიზმის საქართველოში დანერგვა და პოპულარიზაციის ხელშეწყობა, მათ შორის, ერთობლივი პროექტების, ღონისძიებების, მრგვალი მაგიდის, კონფერენციების, სააგენტოში დასაქმებული პირების, სოციალური მუშაკების, იურისტებისა და ფსიქოლოგების, მედიაციაში გადამზადების კურსის ერთობლივი დაორგანიზება და განხორციელება. მედიაციის პოპულარიზაციის მიზნით, შემუშავდება და გამოიცემა ერთობლივი პუბლიკაციები.

მემორანდუმს ხელი მოაწერეს სააგენტოს დირექტორმა, მერი მაღლაფერიძემ და მედიატორთა ასოციაციის თავმჯდომარემ, ირაკლი ყანდაშვილმა.

„საზოგადოებაში მედიაციის, ურთიერთშეთანხმების კულტურის დანერგვა მნიშვნელოვანია. მემორანდუმის ფარგლებში ჩვენი თანამშრომლობა კიდევ უფრო გააუმჯობესებს სამიზნე ჯგუფებისთვის ინფორმაციის მიწოდებას და აამაღლებს ცნობიერებას ოჯახური დავების მედიაციით გადაჭრის მნიშვნელობაზე - დავების ეფექტიანი, მოქნილი და სწრაფი გადაწყვეტისათვის. რაც თავის მხრივ, შეამცირებს დავების ხანგრძლივობას და მხარეებს საშუალებას მისცემს, მოლაპარაკებების გზით შეთანხმების საფუძველზე, პრობლემური საკითხები გადაჭრან და ამოწურონ კონფლიქტი. მაშინ, როცა მშობლებს შორის არსებულ კონფლიქტურ სიტუაციებში ყველაზე მეტად ოჯახის მცირეწლოვანი, მოზარდი, ბავშვები ზარალდებიან,“- განაცხადა მერი მაღლაფერიძემ.

ირაკლი ყანდაშვილის თქმით, ოკუმენტის მიზანია, ერთობლივი ძალებით მედიაციის, როგორც დავის გადაწყვეტის ალტერნატიული მექანიზმის განვითარება და გაძლიერების ხელშეწყობა.

,,მედიაცია არის ნოვაცია, რომელიც არსებული კონფლიქტის მონაწილეებს საშუალებას აძლევს საკუთარი ჩართულობით კონფლიქტი ამოწურონ. განსაკუთრებით ისეთ დავებში, რომელიც ბავშვის ინტერესებს ეხება. ამ მიმართულებით ჩვენი ორი ინსტიტუციის თანამშრომლობა ძალზედ მნიშვნელოვანია,“– აღნიშნა ირაკლი ყანდაშვილმა.

როგორც სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოში აცხადებენ, უახლოეს მომავალში სახელმწიფო ზრუნვის სააგენტო მედიატორთა ასოციაციასთან ერთად განახორციელებს სხვადასხვა აქტივობებს - დაიგეგმება კონკრეტული ნაბიჯები და სამომავლო ერთობლივი ინიციატივები.

ტექსტში შეცდომის აღმოჩენისას, გთხოვთ, მონიშნოთ არასწორი ნაწილი და დააჭირეთ Ctrl + Enter.

კატეგორიის სხვა ახალი ამბები

ბოლო სიახლეები

ბოლო სიახლეები



orphus_system