უწყებათაშორის საკოორდინაციო საბჭოსთან არსებული ოპერაციული შტაბის უფროსის გიორგი ღიბრაძის თქმით, 1-ლი ივლისიდან კომენდანტის საათის მოხსნის მიუხედავად, რესტორნები და გასართობი დაწესებულებები მუშაობას მხოლოდ 00:00 საათამდე შეძლებენ.
როგორც ღიბრაძემ აღნიშნა, შეზღუდვა შეეხებათ სასტუმროს რესტორნებსაც.
"რესტორნები იმუშავებენ მხოლოდ 00:00 საათამდე. იგივე ეხება სხვა გასართობ დაწესებულებებს, მათ შორის ღამის კლუბებს და ისეთ დაწესებულებებს, რომელიც დაკავშირებულია საზოგადოებრივ კვებასთან. ეს ეხება სასტუმროს რესტორნებსაც, რომლებსაც ჰყავთ სტუმარი და აქვთ სარესტორნო სივრცე", - თქვა ღიბრაძემ.
საკოორდინაციო საბჭოს გადაწყვეტილებით, 1 ივლისიდან ქვეყანაში კომენდანტის საათი უქმდება. გარდა ამისა, დღეიდან ღია სივრცეში პირბადის ტარება სავალდებულო აღარ იქნება.
