ჯანდაცვის მინისტრის პირველი მოადგილის თამარ გაბუნიას განცხადებით, Pfizer-ის ვაქცინით აცრის პროცესი საქართველოში სამშაბათიდან, 30 მარტიდან დაიწყება.
"საქართველოში Pfizer-ის ვაქცინის 29 250 დოზა შემოვიდა. მე მინდა ყველა პარტნიორ ორგანიზაციას მადლობა ვუთხრა, ვინც ვაქცინის მიღებაში დაგვეხმარა. დღეს საღამოდან Pfizer-ის ვაქცინა აისახება რიგის დაჯავშნის პორტალზე. ამდენად, მოქალაქეს ექნება საშუალება არჩევანი გააკეთოს ორ ვაქცინას შორის. Pfizer-ის ვაქცინით ვაქცინაცია 6 სამედიცინო დაწესებულებაში ჩატარდება. Pfizer-ით ვაქცინაცია სამშაბათიდან დაიწყება,"- განაცხადა თამარ გაბუნიამ.
ვაქცინაციისთვის მოქალაქეები უნდა დარეგისტრირდნენ მითითებულ ბმულზე. ნახეთ, რომელ ქალაქებსა და კლინიკებში იქნება შესაძლებელი Pfizer-ით ვაქცინაცია.
Pfizer-ის ვაქცინის 29 250 დოზა საქართველოში დღეს შემოვიდა. მანამდე კი 13 მარტს, ქვეყანამ AstraZeneca-ს ვაქცინის 43 200 დოზა მიიღო.
