საქართველოს პრემიერ-მინისტრმა აშშ-ს ევროკავშირის ქვეყნებს, ასევე ჩინეთსა და სხვა ვაქცინის მწარმოებლებს მადლობა გადაუხადა პანდემიასთან ბრძოლაში დახმარებისთვის. ამის შესახებ მან გაეროს 76-ე სესიის გენერალურ დებატებზე სიტყვით გამოსვლისას განაცხადა.
„ამ შეხვედრის მნიშვნელობა უდავოდ დიდია. სამყარო კვლავ შეუპოვრად იბრძვის ახალი კორონავირუსის წინააღმდეგ, რომელმაც შეარყია მსოფლიო, არ დაინდო ეკონომიკა და ადამიანთა სიცოცხლე.
ძალისხმევას არ ვიშურებთ პანდემიიდან უკეთეს მდგომარეობაში გამოსვლისთვის ერთობის ახლებური გააზრებით, მაგრამ უნდა გავერთიანდეთ მსოფლიოს საჭიროებათა დასაკმაყოფილებლად.
საქართველო დიდად მადლობელია ამერიკის შეერთებული შტატების, ევროკავშირის, ჩინეთის და ვაქცინების მწარმოებლებისადმი, რომლებმაც მოგვაწოდეს მარაგები ქართველი ხალხის ჯანმრთელობის დასაცავად.
საერთო მიზნისთვის მუშაობის გზით დავასრულებთ პანდემიას და დავუბრუნდებით მთელი მსოფლიოსთვის უკეთესი, ნათელი მომავლის შენებას”,- განაცხადა ირაკლი ღარიბაშვილმა.
