„თბილისი ცენტრალის“ მიმდებარედ, ფიროსმანის ქუჩაზე, ბენზინგასამართ სადგურ "სენტას" ხანძარი გაუჩნდა. დაშავებულია ხუთი პირი. მათ შორის, ერთი ქალი, ერთი არასრულწლოვანი და სამი მამაკაცი. ინფორმაცია ამის შესახებ Report.ge-ს თვითმხილველებმა მიაწოდეს. მათ აფეთქების ხმაც გაიგონეს.
საგანგებო სიტუაციების მართვის სამსახურის ცნობით, ადგილზე 9 სახანძრო-სამაშველო ბრიგადა მუშაობდა. ძლიერი ცეცხლი და დაკვამლიანება ბენზინგასამართი სადგურის მიმდებარედ არსებული მაღაზიის 2 ოთახში იყო გავრცელებული. ხანძარი ამ დროისთვის ლიკვიდირებულია. შემთხვევას მსხვერპლი არ მოჰყოლია. დაშავებულები სასწრაფო სამედიცინო სამსახურის თანამშრომლებმა კლინიკებში გადაიყვანეს.
როგორც Report.ge-ს ხეჩინაშვილის სახელობის საუნივერსიტეტო კლინიკის დამწვრობის ცენტრის ხელმძღვანელმა გუგა ქაშიბაძემ განაცხადა, კლინიკაში შეიყვანეს სამი პაციენტი. მათგან ორი რეანიმაციაში, ხოლო ერთი ქირურგიულ განყოფილებაშია მოთავსებული.
