თავში

თენგიზ ცერცვაძე: დექსამეტაზონის გამოყენება არ არის სასურველი

თენგიზ ცერცვაძე: დექსამეტაზონის გამოყენება არ არის სასურველი
თენგიზ ცერცვაძე: დექსამეტაზონის გამოყენება არ არის სასურველი

ინფორმაციას, რომ ერთ-ერთ კვლევაში კორონავირუსთან ბრძოლაში დექსამეტაზონმა კარგი ეფექტი აჩვენა, თბილისის ინფექციური საავადმყოფოს დირექტორი თენგიზ ცერცვაძე ეხმაურება.  

„დექსამეტაზონი და სხვა კორტიკოსტეროიდები, პრედნიზოლონი და სხვა, საქართველოში და ყველა ქვეყანაში ფართოდ გამოიყენება, ამაში არაფერი ახალი არ არის. უბრალოდ, იმ კონკრეტულმა კვლევამ უჩვენა, რომ მძიმე პაციენტების გარკვეულ პროცენტში იძლეოდა დამაიმედებელ შედეგებს, შეიძლება, ხვალ სხვა კვლევა გამოქვეყნდეს, რომელმაც შეიძლება თქვას, რომ ეს მთლად ასე არ არის, მაგრამ თვითონ კორტიკოსტეროიდები არის ფართედ მოხმარებადი მედიკამენტები და მათ შორის კოვიდის დროსაც გამოიყენებოდა ფართოდ, ოღონდ ამ კორტიკოსტეროიდებს აქვს თავისი ჩვენებები, ისევე როგორც სხვა ყველა დანარჩენ მედიკამენტს. ამ კუთხით მათი გამოყენება არ არის მიზანშეწონილი და საჭიროა თავის შეკავება, თუ არ არის სპეციალური ჩვენებები. ანუ, როდესაც ვირუსი გამოწვეული ე.წ. ციტოკინური შტორმია, ეს სამედიცინო ტერმინია და ნიშნავს ბიოლოგიურად აქტიური ნივთიერებების, ციტოკინების ორგანიზმში ჭარბი რაოდენობით გამოთავისუფლებას, რაც ხდება ვირუსის გავლენით და ეს ბიოლოგიურად აქტიური ნივთიერებები ხელს უწყობენ ძლიერი ანთებითი რეაქციის განვითარებას.

ეს პროცესი დასაწყისში მიმართულია ადამიანის დასაცავად, მაგრამ რაღაც ეტაპზე უკვე დამაზიანებელია, როცა ეს შტორმი იწყება და ზოგჯერ ხდება სიკვდილის მიზეზიც. არის ასეთი შემთხვევები, როცა ვირუსი შეიძლება აღარც იყოს ორგანიზმში, გაქრეს და ამ ვირუსით გამოწვეულმა ციტოკინურმა შტორმმა გამოიწვიოს პაციენტის დამძიმება და შესაძლოა, ლეტალობა. 

ტაქტიკა არის ასეთი, როცა ციტოკინური შტორმი არ არის გამოხატული, დექსამეტაზონის გამოყენება არ არის სასურველი და მიზანშეწონილი, მაგრამ მძიმე ავადმყოფებში, რომლებიც მოთავსებული არიან რეანიმაციაში მართვით სუნთქვაზე, მათი გამოყენება გამოდგა კარგი, მან შეამცირა ლეტალობის მაჩვენებლები“,- განაცხადა თენგიზ ცერცვაძემ.

ცნობისთვის, ბრიტანელმა მეცნიერებმა აღმოაჩინეს, რომ იაფი და ყველასთვის ხელმისაწვდომი პრეპარატი COVID-19-ით ინფიცირებული პაციენტების მკურნალობისას ძალიან ეფექტური აღმოჩნდა.

საუბარია პრეპარატ დექსამეტაზონზე. მეცნიერების თქმით, მისი გამოყენების შედეგად ინფიცირებულთა სიკვდილიანობა, რომლებიც ფილტვების ხელოვნური ვენტილაციის აპარატზე იყვნენ მიერთებულნი, ერთი მესამედით შემცირდა.

ტექსტში შეცდომის აღმოჩენისას, გთხოვთ, მონიშნოთ არასწორი ნაწილი და დააჭირეთ Ctrl + Enter.

კატეგორიის სხვა ახალი ამბები

ბოლო სიახლეები

ბოლო სიახლეები



orphus_system