მსოფლიო პატრიარქი შატილის გზაზე მომხდარ ტრაგედიასთან დაკავშირებით მწუხარებას გამოთქვამს. ბართლომეოსმა სამძიმრის წერილი სრულიად საქართველოს კათოლიკოს-პატრიარქ ილია მეორეს გამოუგზავნა.
,,უწმიდესო და უნეტარესო სრულიად საქართველოს კათოლიკოს–პატრიარქო, მცხეთა–თბილისის მთვარეპისკოპოსო და ბიჭვინთისა და ცხუმ-აფხაზეთის მიტროპოლიტო, ქრისტესმიერო უსაყვარლესო და სასურველო ძმაო და თანამსახურო ბატონო ილია, ძმური სიყვარულით ვეხვევი თქვენს უნეტარესობას და მოგახსენებთ.
დიდი მწუხარებით შევიტყეთ მასმედიის მეშვეობით მცხეთა-მთიანეთში მომხდარი უბედური ავარიის შესახებ, რის შედეგადაც ტრაგიკული სიკვდილით გარდაიცვალა ჩვიდმეტი ადამიანი, ხოლო სხვა გადარჩენილი ტრავმირებულები გადაყვანილ იქნენ საავადმყოფოში.
ლოცვით მოვაპყრობთ რა ჩვენს სულიერ მზერას თქვენი ყოვლად პატივცემული და დიდად საყვარელი უნეტარესობის, საქართველოს ღვთისმოსავი ერისა და მოძმე წმინდა ეკლესიის მიმართ, გამოვხატავთ მსოფლიო საპატრიარქოს და პირადად ჩემს ღრმა თანაგრძნობას და ვლოცულობთ თქვენთან ერთად, რომ უფალმა ღმერთმა მიანიჭოს შვება, უსამართლოდ გარდაცვლილ ჩვენს უდანაშაულო მოძმეთა სულებს,
შევთხოვთ უფალს ასხუროს ბალზამი ნუგეშისა მათი ოჯახების გულებს, და მთლიანად საქართველოს მგლოვიარე, მამაც და მოწამე ერს, რომელთანაც ჩვენი კონსტანტინეპოლის ეკლესიას აკავშირებს განსაკუთრებული სიყვარულისა და სოლიდარობის ძლიერი და უშრეტი კავშირი, მისცეს ზეციერი ნუგეში.
ყოველივე ამით, გემშვიდობებით, გეხვევით და გეამბორებით ქრისტესმიერი წმინდა ამბორით, უდიდესი პატივისცემითა და ძმური სიყვარულით.
თქვენი ქრისტესმიერი ძმა კონსტანტინეპოლის ბართოლომეოსი", - აღნიშნულია სამძიმრის ტექსტში.
ცნობისთვის, 23 აგვისტოს, შატილის გზაზე, სოფელ ბისოს სიახლოვეს, მიკროავტობუსი 80 მეტრის სიმაღლიდან კლდოვან ფერდობზე გადავარდა. ავტოსაგზაო შემთხვევას 17 ადამიანი ემსხვერპლა. სამი ადამიანი მძიმედ დაშავდა.
