UNESCO-მ "TV პირველის" გარდაცვლილი ოპერატორი 2021 წელს მოკლულ ჟურნალისტთა სიაში შეიყვანა.
მონაცემები ორგანიზაციის ვებგვერდზე გამოქვეყნდა.
"ალექსანდრე ლაშქარავა, მკვლელობის თარიღი - 5 ივლისი, ეროვნება - ქართველი", - წერია იუნესკოს საიტზე.
შეგახსენებთ, 2021 წლის 5 ივლისს, თბილისში, რუსთაველის გამზირზე, "თბილისი პრაიდის" კვირეულის მოწინააღმდეგე რადიკალური ჯგუფები ჟურნალისტებს თავს დაესხნენ.
შსს-ს ინფორმაციით, 5 ივლისს, ძალადობის მსხვერპლი 55 ადამიანი გახდა, მათ შორის 53 მედიის წარმომადგენელია.
რადიკალური ჯგუფები, მედიის წარმომადგენლებს 6 ივლისსაც დაესხნენ თავს.
"ტვ პირველის" ოპერატორს, ლექსო ლაშქარავას 5 ივლისის მოვლენებისას ფიზიკურად გაუსწორდნენ.
ის რამდენიმე დღის განმავლობაში "ნიუ ჰოსპიტალსში" მკურნალობდა.
11 ივლისს კი საკუთარ სახლში გარდაცვლილი ნახეს.