მცხეთასთან მომხდარ ავარიას, სამი ახალგაზრდა ქალის სიცოცხლე შეეწირა. მდინარე მტკვარში ავტომობილის გადავარდნის შედეგად დაიღუპნენ ბელა გეგუჩაძე, მარიამ როსტიაშვილი და მაკა შუბითიძე.
ბელა გეგუჩაძე მცხეთის სამედიცინო ცენტრის ექთანი იყო. ბოლო პერიოდში კი კოვიდცენტრში მუშაობდა. ბელას სამი შვილი დარჩა, მარიამს ორი და მაკას ასევე სამი.
საგანგებო სიტუაციების მართვის სამსახურის ინფორმაციით, გზის სავალ ნაწილზე მოძრავი ავტომობილი მდინარე მტკვარში დაახლოებით 30 მეტრის სიმაღლიდან გადავარდა და საჭირო იყო სახანძრო-სამაშველო ძალების დახმარება.ადგილზე უმოკლეს დროში გამოცხადდნენ საგანგებო სიტუაციების მართვის სამსახურის თანამშრომლები. პირველი მორეაგირე ჯგუფის ინფორმაციით, ავტომობილი მთლიანად წყლით იყო დაფარული, რის გამოც მცხეთის მიმართულებით დამატებით გავიდნენ განსაკუთრებულ სიტუაციებზე რეაგირების მთავარი სამმართველოს მაშველები და მყვინთავთა ჯგუფი, შესაბამისი ტექნიკითა და აღჭურვილობით. რამდენიმესაათიანი უწყვეტი საძიებო-სამაშველო ოპერაციის შედეგად, მეხანძრე-მაშველებმა წყლის ფსკერზე, ავტომობილში მყოფი 2 ადამიანის ცხედარი იპოვეს. მოგვიანებით, მყვინთავებმა კიდევ ერთი ცხედარი აღმოაჩინეს. საგანგებო სიტუაციების მართვის სამსახურის თანამშრომლებმა 3-ვე ცხედარი წყლიდან ამოასვენეს. მდინარე მტკვრის ფსკერიდან ამოტანილია ავტომობილიც.
