აზერბაიჯანის ახალგაზრდობისა და სპორტულ საქმეთა სამინიტროს, აზერბაიჯანისა და საქართველოს ჭადრაკის ფედერაციების ხელშეწყობითა და კომპანია SOCAR-ის ორგანიზებით აბრეშუმის გზის საერთაშორისო თასზე ბლიც-საჭადრაკო ტურნირი ონლაინ რეჟიმში გაიმართება.
ჭადრაკის საერთაშორისო ფედერაციის ვიცე-პრეზიდენტის მაჰირ მამედოვის ინიციატივით, ტურნირი საქართველოსა და აზერბაიჯანის 26 და 28 მაისის დამოუკიდებლობის დღეებისადმი იქნება მიძღვნილი.
ღონისძიება ორ ქვეყანას შორის სპორტული ურთიერთობების გაღრმავებას, პანდემიის დღეებში ჭადრაკის თამაშის პრაქტიკის შენარჩუნებასა და სპორტის ამ სახეობის პროპაგანდას ისახავს მიზნად.
ტურნირი ვირტუალურ სათამაშო პლატფორმა playchess.com.-ზე გაიმართება. მასში მონაწილეობას 50 მოჭადრაკე მიიღებს. ტურნირის საერთო საპრიზო ფონდი 20 000 ევროა.
