ალბერტ აინშტაინის ხელნაწერი, რომელშიც ის ფარდობითობის თეორიაზე წერს, პარიზში 11,6 მილიონ ევროდ გაიყიდა. DW-ს ცნობით, ინფორმაცია ამის შესახებ აუქციონის სახლმა Christie's გაავრცელა.
54-გვერდიანი დოკუმენტი დიდმა ფიზიკოსმა თავის ახლო მეგობართან, შვეიცარიელ ინჟინერ მიქელე ბესოსთან ერთად ბერლინსა და ციურიხში 1913-1914 წლებში დაწერა. ეს არის აინშტაინის შემორჩენილი ორი ხელნაწერიდან ერთ-ერთი, რომელიც ფარდობითობის თეორიის ჩამოყალიბებას უკავშირდება.
გარდა ამისა, გაყიდული ლოტი ყველაზე ძვირადღირებული სამეცნიერო ხელნაწერი გახდა, რომელიც საფრანგეთში აუქციონზე ოდესმე გაყიდულა. ვინ იყიდა აინშტაინის მანუსკრიპტი, ჯერჯერობით უცნობია.
