ესპანური გამოცემა "ElDiario" აზერბაიჯანის პრეზიდენტის, ილჰამ ალიევის 26 მაისის პრესკონფერენციას სტატიას უძღვნის. მასში აღნიშნულია, რომ ალიევმა სომხეთში "მთიანი ყარაბაღის ომში დამარცხების შემდეგ გაჩენილ კრიზისს სომხეთის შიდა საქმე" უწოდა.
ამასთან, აზერბაიჯანის ლიდერმა აღნიშნა, რომ შექმნილმა სიტუაციამ 2020 წლის ნოემბერში ხელმოწერილი შეთანხმების შესრულებას ხელი არ უნდა შეუშალოს.
"ახლა სომხეთში აბსოლუტურად კრიზისული მდგომარეობა სუფევს. მე არ მსურს კომენტარი გავაკეთო მათ შიდა სიტუაციაზე. პრინციპში, ჩვენ არასდროს ვერევით სხვა ქვეყნების შიდა საქმეებში, განსაკუთრებით ამჟამინდელ მგრძნობიარე პერიოდში. 10 ნოემბერს ხელმოწერილი განცხადება სრულდება და სრულად უნდა შესრულდეს", - ციტირებს გამოცემა ილჰამ ალიევის სიტყვებს.
ამასთან, გამოცემა აღნიშნავს, რომ აზერბაიჯანის პრეზიდენტმა ხაზი გაუსვა, რომ სომხეთი კიდევ უფრო რთულ სიტუაციაში აღმოჩნდება, თუ განცხადების დებულებებს არ შეასრულებს.
აზერბაიჯანის პრეზიდენტმა ასევე აღნიშნა, რომ სომხეთს ყველა სამხედრო ტყვე დაუბრუნეს. მისი თქმით, 60-ზე მეტი სომეხი ჯარისკაცი ტერორისტია, ამიტომ ისინი სამხედრო ტყვეებად ვერანაირად ვერ ჩაითვლებიან.
"ილჰამ ალიევი არ გამორიცხავს მომავალში სომხეთთან ურთიერთობის ნორმალიზებას და გარკვეულ ეტაპზე სამშვიდობო ხელშეკრულების ხელმოწერას, თუმცა 2020 წლის 10 ნოემბრის განცხადება, ფაქტობრივად, სომხეთის კაპიტულაციის აქტი და დე ფაქტო სამშვიდობო ხელშეკრულებაა", - წერს გამოცემა.
