აშშ-ის მოსახლეობის 68% მიიჩნევს, რომ კორონავირუსის პანდემიის წინააღმდეგ აშშ-ის პრეზიდენტის, ჯო ბაიდენის მიერ გატარებული ღონისძიებები მართებულია. ამას ABC News-ის დაკვეთით მომზადებული Ipsos-ის გამოკითხვის შედეგები ადასტურებს.
ამასთან, პანდემიის მიმართ ბაიდენის რეაგირებას დადებითად რესპუბლიკელთა 35% მიიჩნევს, ხოლო დემოკრატთა - 98%.
ამავდროულად, ამერიკელთა უმეტესობას მიაჩნია, რომ შეზღუდვების მოხსნა ჯერ ნაადრევია. გამოკითხულთა 56% თვლის, რომ პირბადეების ტარება კვლავ სავალდებულო უნდა იყოს. ხოლო, 50%-ის მოსაზრებით საჭიროა, რომ საზოგადოებრივ ადგილებში შეკრებაზე დაწესებული შეზღუდვები კვლავ გახანგრძლივდეს.
გარდა ამისა, გამოკითხვით ცნობილი გახდა, რომ ვაქცინაცია აშშ-ის მოსახლეობის 28%-ს ჩაუტარდა, ხოლო 15%-ს ვაქცინის გაკეთების შესაძლებლობა არ მიეცა.
მანამდე, ბაიდენმა განაცხადა, რომ ივნისის ბოლომდე 300 მილიონი ამერიკელი აიცრება.
