შეერთებულ შტატებში 14 დეკემბრიდან კორონავირუსის ვაქცინაციის კამპანია იწყება. კომპანია BioNTech–ისა და Pfizer–ის მიერ შექმნილი კორონავირუსის საწინააღმდეგო ვაქცინა ვაქცინაციის 145 ცენტრს გადაეცემა. ამის შესახებ შაბათს, თეთრი სახლის მასობრივი ვაქცინაციის პროგრამის ერთ-ერთმა ხელმძღვანელმა, გენერალმა გუს პერნამ განაცხადა.
მისივე თქმით, ვაქცინის ტრანსპორტირება უკვე დაწყებულია.
ვაქცინაცია პირველ ეტაპზე ჯანდაცვის მუშაკებსა და მოხუცთა თავშესაფარში მყოფ პირებს ჩაუტარდებათ.
მანამდე, 12 დეკემბერს აშშ-ის პრეზიდენტმა დონალდ ტრამპმა განაცხადა, რომ ვაქცინაცია უახლოეს 24 საათში დაიწყებოდა.
შეგახსენებთ, კომპანია Pfizer-ისა და BioNTech-ის მიერ შემუშავებული COVID-19-ის ვაქცინა აშშ-ის სურსათისა და მედიკამენტების ადმინისტრაციის მიერ დამტკიცებული ან ლიცენზირებული არ არის, თუმცა, 12 დეკემბერს ადმინისტრაციამ 16 წელს მიღწეულ პირებში მისი გადაუდებელი საჭიროების შემთხვევაში გამოყენების ნებართვა გასცა.