აშშ-ში, მინესოტას შტატში, ქალაქ მინეაპოლისში, აფროამერიკელი ჯორჯ ფლოიდის გარდაცვალების ადგილზე სროლის შედეგად კიდევ ერთი პირი დაიღუპა. ამის შესახებ CNN იუწყება.
გამოცემის ცნობით, სროლა ორ პიროვნებას შორის ჩხუბის შემდეგ მოხდა. ჩხუბის ერთ-ერთმა მონაწილემ ცეცხლი გახსნა. დაზარალებული საავადმყოფოში გადაიყვანეს, სადაც გარდაიცვალა. მომხდარს პოლიცია იძიებს.
აშშ-ში, მინეაპოლისში, გასული წლის 25 მაისს პოლიციამ აფროამერიკელი ჯორჯ ფლოიდი მოკლა. რის შემდეგაც შეერთებულ შტატებში რამდენიმე თვიანი საპროტესტო აქციები და არეულობები დაიწყო. ინტერნეტში გამოჩნდა ვიდეო, რომელშიც პოლიციელმა ფლოიდს ხელბორკილი დაადო და სახე გზის სავალ ნაწილზე მიაბჯენინა. ფლოიდი შველას ითხოვდა, ვინაიდან სუნთქვა აღარ შეეძლო, თუმცა პოლიციელებმა მისი თხოვნა არ გაითვალისწინეს. ჯორჯ ფლოიდის მკვლელობის ბრალდებით ერთი პოლიციელი დაკავებულია, ხოლო ოთხი თანამდებობიდან გაათავისუფლეს.
