ავსტრალიის ჩრდილო-აღმოსავლეთ სანაპიროზე, ბარონის პარკში 44 წლის მამაკაცს, რომელიც ნაპირზე ბანაობდა, ნიანგი დაესხა თავს. დაზარალებულმა ცხოველის ყბების გახსნა და ნაპირზე გაქცევა მოახერხა. იქვე მყოფმა ადამიანებმა მას პირველადი დახმარება გაუწიეს და სასწრაფო სამედიცინო დახმარების სამსახური გამოიძახეს.
ექიმების ცნობით, მამაკაცმა თავისა და მკლავის არეში მრავლობითი დაზიანება მიიღო.
პარკი და მისი შემოგარენი საზოგადოებისთვის ამჟამად დაკეტილია. მაშველებმა ტურისტებს მოუწოდეს, სიფრთხილე გამოიჩინონ და დაიცვან ხელისუფლების მიერ გაცემული რეკომენდაციები. ადგილობრივი დეპარტამენტის რეინჯერებმა ქვეწარმავლის ადგილმდებარეობის დადგენა და მისი დაჭერის ოპერაცია დაიწყეს.
