აშშ-ის პრეზიდენტი ჯო ბაიდენი არ დაესწრება ოლიმპიურ თამაშებს, რომლებიც იაპონიაში ივლისში დაიწყება. ამის შესახებ თეთრი სახლის პრესსპიკერმა, ჯენ პსაკიმ განაცხადა.
ამასთან, მისი თქმით, აშშ-ის მხრიდან ოლიმპიადას, როგორც ყოველთვის, დელეგაცია დაესწრება.
"ამერიკული ადმინისტრაცია არ ივიწყებს თავის რეკომენდაციებს საზღვარგარეთ მხოლოდ ყველაზე აუცილებელი მოგზაურობების შესრულების შესახებ", - განაცხადა პსაკიმ.
ტოკიოს ოლიმპიადა, რომელიც კორონავირუსის პანდემიის გამო ერთი წლით, 2021 წლამდე გადაიდო, 23 ივლისიდან 8 აგვისტომდე ჩატარდება.
მანამდე გავრცელდა ინფორმაცია, რომ ოლიმპიადაზე უცხოელ მაყურებლებს არ დაუშვებენ.
უახლესი გადაწყვეტილებების თანახმად, ოლიმპიურ თამაშებზე მაყურებლის ლიმიტი ობიექტის ტევადობის 50% -ით, მაქსიმუმ 10 ათასი ადამიანით განისაზღვრა.