დიდი ბრიტანეთის პრემიერ-მინისტრმა, ბორის ჯონსონმა ახალი კორონავირუსის პრევენციის მიზნით დაწესებული კარანტინის რეჟიმიდან გამოსვლის გეგმა წარადგინა. ამის შესახებ ინფორმაციას BBC ავრცელებს.
ჯონსონის განცხადებით, გეგმის შესრულება დამოკიდებულია იმაზე, თუ როგორ გაუმკლავდება სამეფო დაავადებას და რამდენად წარმატებულად მოახერხებს მის წინააღმდეგ ბრძოლას.
პრემიერ-მინისტრი ინგლისში კორონავირუსის საფრთხის ხუთსაფეხურიანი გამაფრთხილებელი სისტემას დანერგვას გეგმავს.
ამ სისტემის თანახმად, ინფექციის საფრთხის დონე განისაზღვრება მწვანედან (1–დან) წითლამდე (5-მდე) და განსხვავდება მიღებული მონაცემების მიხედვით. ჯონსონმა გამოაცხადა, რომ ქვეყანა ახლა მე-4 დონეზეა, "მაგრამ ახლა ჩვენ შეგვიძლია დავიწყოთ მესამე დონეზე გადასვლა."
საფრთხის დონეს ბიოუსაფრთხოების ერთობლივი ცენტრი გააკონტროლებს, რომელიც ასევე განსაზღვრავს კორონავირუსის ინფექციის საშიშროების ხარისხს ქვეყნის სხვადასხვა კუთხეში. ეს ნიშნავს, რომ ერთ ქალაქში საფრთხის დონე შეიძლება მნიშვნელოვნად განსხვავდებოდეს სხვა ქალაქის დონეზე.
მთავრობა შეცვლის ლოზუნგს "დარჩით სახლში" და ახალი ლოზუნგი იქნება ”ფრთხილად იყავით, აკონტროლეთ ვირუსი, გადაარჩინეთ სიცოცხლე”.
ორშაბათს სამუშაოზე გავლენ პირები, რომელთა სამუშაო სპეციფიკაც დისტანციურად მუშაობის შესაძლებლობას არ იძლევა.
ოთხშაბათს, ინგლისის მაცხოვრებლებს შეეძლებათ სპორტული აქტივობებით დაკავება. ახლა მათ შეუძლიათ სავარჯიშოზე გასვლა დღეში მხოლოდ ერთხელ.
დაწყებითი სკოლების გახსნა 1 ივნისს იგეგმება, ასევე ამ პერიოდიდან დაიწყება მაღაზიების ეტაპობრივი გახსნა.
ბარების, რესტორნების, სასტუმროების და სხვა საჯარო ადგილების გახსნა შესაძლოა ივლისამდე ვერ მოხერხდეს.
