ჩრდილოატლანტიკური ალიანსის სამიტი ბრიუსელში დღეს ოფიციალურად გაიხსნა. არსებული და მომავალი უსაფრთხოების გამოწვევების განსახილველად, ალიანსის წევრი და პარტნიორი ქვეყნების სახელმწიფოს მეთაურები და მთავრობის ხელმძღვანელი პირები უკვე შეიკრიბნენ.
წელს პირველად, NATO-ს სამიტს აშშ-ის ახალი პრეზიდენტი, ჯოზეფ ბაიდენი დაესწრება.
”ჩვენ ახალი გამოწვევების წინაშე ვდგავართ: რუსეთი, რომლის მოქმედებები ჩვენს მოლოდინს არ აკმაყოფილებს და ჩინეთი”, - აღნიშნა აშშ-ის პრეზიდენტმა.
წლევანდელ სამიტზე უკრაინასა და საქართველოსთან თანამშრომლობის საკითხებსაც განიხილავენ.
ჩრდილოატლანტიკურ ალიანსს შავ ზღვაში მნიშვნელოვანი პარტნიორები ჰყავს - საქართველო და უკრაინა, - ამის შესახებ NATO-ს გენერალურმა მდივანმა, იენს სტოლტენბერგმა ბრიუსელის ფორუმზე სიტყვით გამოსვლისას განაცხადა.
2008 წელს NATO-ს ბუქარესტის სამიტის დეკლარაციაში ჩაიწერა, რომ საქართველო აუცილებლად გახდება NATO-ს წევრი. ქართულმა მხარემ განცხადა, რომ აღნიშნული გადაწყვეტილება უმნიშვნელოვანეს პოლიტიკურ გზავნილს წარმოადგენს საქართველოს NATO-ში გაწევრიანების გზაზე, რაც არაერთხელ დადასტურდა NATO-ს მომდევნო სამიტებზე.
2008 წელს, აგვისტოს ომის შემდეგ, NATO-ს წევრმა ქვეყნებმა გამოთქვეს მზადყოფნა და მიიღეს გადაწყვეტილება NATo-საქართველოს კომისიის შექმნის შესახებ. NATo-საქართველოს კომისია ოფიციალურად 2008 წლის სექტემბერში ჩრდილოატლანტიკური საბჭოს ვიზიტის დროს დაფუძნდა.
NATO-ს წევრი ქვეყნებისა და მთავრობების ლიდერების სამიტი 2022 წელს ესპანეთში გაიმართება.