კომპანიებმა Facebook Inc და Twitter Inc განაცხადეს, რომ რუსეთთან დაკავშირებული ათობით ყალბი ანგარიში წაშალეს. ინფორმაციას ამის შესახებ სააგენტო Reuters ავრცელებს.
ანგარიშებს განიდან და ნიგერიიდან მართავდნენ და ისინი აშშ-ის მომხმარებლებისთვის იყო განკუთვნილი.
Facebook-მა 49 სამომხმარებლო ანგარიში და 69 გვერდი წაშალა, ასევე Instagram-ის 85 ანგარიში.
კომპანიის თქმით ანგარიშები რუსეთის ინტერნეტ-კვლევების სააგენტოსთან ("ტროლების ფაბრიკა") იყო დაკავშირებული, რომელსაც 2016 წელს აშშ-ის არჩევნებში ჩარევასთან კავშირში ადანაშაულებენ. კომპანიას რუსეთის პრეზიდენტ ვლადიმერ პუტინთან დაახლოებულ ბიზნესმენთა, ევგენი პრიგოჟინთან აკავშირებენ.
Facebook-ში აცხადებენ, რომ კომპანია აშშ-ის ფერადკანიან მოსახლეობაზე წერდა და ამტკიცებდა, რომ ქვეყანაში მათი უფლებები ილახება, პოლიცია კი ძალადობას იჩენს მათ მიმართ.
Twitter-მა 71 ანგარიში წაშალა. ისინიც განიდან და ნიგერიიდან იმართებოდა. კომპანია აცხადებს, რომ რუსეთთან კავშირის მტკიცებულებები მას ხელთ აქვს. ანგარიშების მიზანი "სოციალურ, რასობრივ და ადამიანის უფლებების საკითხებზე დიალოგში ჩართვის გზით შუღლის გაღვივება იყო".
