ბურკინა-ფასოში დააკავეს სამხედრო მოსამსახურეების ჯგუფი, რომელიც ქვეყანაში ძალაუფლების ხელში ჩაგდებაშია ეჭვმიტანილი. ამის შესახებ ინფორმაციას ადგილობრივი საინფორმაციო სააგენტო ქვეყნის სამხედრო იუსტიციაზე დაყრდნობით ავრცელებს.
"სამხედრო ტრიბუნალმა 8 იანვარს ჯგუფის ერთ-ერთი წევრის მიერ მოწოდებული ინფორმაციის საფუძველზე საქმე აღძრა. ის რესპუბლიკური ინსტიტუტების დესტაბილიზაციის მცდელობაშია ეჭვმიტანილი", - აღნიშნულია სამხედრო იუსტიციის ინფორმაციაში.
8 სამხედრო მოსამსახურე 11 იანვარს დააკავეს და დაკითხეს.
ბოლო რამდენიმე თვის განმავლობაში, ბურკინა-ფასოს პრეზიდენტმა როკ მარკ კრისტიან კაბორემ ქვეყნის შეიარაღებული ძალების სარდლობაში რამდენიმე მნიშვნელოვანი საკადრო ცვლილება განახორციელა. რამდენიმე სამხედრომ თანამდებობა დაკარგა.