თბილისში მომხდარი ინციდენტის გამო საქართველოს ხელისუფლების წარმომადგენლებს ჩემთვის ბოდიში არ მოუხდიათ, - ამის შესახებ რუსულ მედიას ჟურნალისტმა და ტელეწამყვანმა, ვლადიმერ პოზნერმა განუცხადა.
"ჩემთვის ბოდიში არავის მოუხდიან. მაგრამ ვიცი, რომ საქართველოს პრემიერ-მინისტრმა ამასთან დაკავშირებით მწუხარება გამოთქვა. ამის შესახებ პესკოვმა თქვა. მაგრამ ჩემთვის პირადად არავის დაურეკავს", - განაცხადა პოზნერმა კითხვაზე, ეკონტაქტა თუ არა მას ვინმე საქართველოს ხელისუფლებიდან.
ამასთან, მან ისევ აღნიშნა, რომ ამ თემაზე კომენტარის გაკეთებას არ აპირებს და საკითხს აღარ დაუბრუნდება.
ამასთან, პოზნერმა საკუთარ ვებგვერდზე საქართველოში ვიზიტის შესახებ ჩანაწერი გამოაქვეყნა.
მისი თქმით, მან თბილისიდან წასვლის გადაწყვეტილება იმიტომ მიიღო, რომ მეგობრების სიცოცხლე საფრთხეში არ ჩაეგდო. ამასთან, აღნიშნა, რომ საქართველოში აუცილებლად დაბრუნდება.
"მინდა სრული სიცხადით ვთქვა, რომ არანაირი წყენა საქართველოზე, ან ქართველებზე არ მაქვს", - განაცხადა პოზნერმა.
ცნობისთვის, ვლადიმერ პოზნერი საქართველოში დაბადების დღის აღსანიშნავად ჩამოვიდა.
თბილისში რუსი ჟურნალისტის ვიზიტს პროტესტი მოჰყვა.
"აჭარა ჯგუფმა", რომლის მფლობელობაში არსებულ სასტუმრო "რუმსშიც" პოზნერი და მისი სტუმრები დაბინავდნენ, განცხადება გაავრცელა, სადაც აღნიშნულია, რომ ისინი იზიარებენ პროტესტის სულისკვეთებას და გმობენ ოკუპაციას.
შსს-ში განაცხადეს, რომ ვლადიმერ პოზნერი ამერიკის მოქალაქეა და მას ოკუპაციის შესახებ კანონი არ დაურღვევია.
სასტუმრო, ვინოტელი, სადაც ვლადიმერ პოზნერმა და მისმა მეგობრებმა ივახშმეს, შრომის ინსპექციამ 10 000 ლარით დააჯარიმა.
ვლადიმერ პოზნერმა და მისმა სტუმრებმა სასტუმრო პოლიციის კორდონის საშუალებით დატოვეს.
სასტუმრო ,,რუმს ჰოტელს", სადაც რუსი ჟურნალისტი ვლადიმერ პოზნერი და მისი სტუმრები დაბინავდნენ, კვერცხები ესროლეს.
გამთენიისას, ვლადიმერ პოზნერმა და მისმა სტუმრებმა საქართველო დაგეგმილზე ადრე, ჩარტერული რეისით დატოვეს.
პოლიციამ რუსი ჟურნალისტი და მისი 31 სტუმარი იზოლაციისა და კარანტინის წესის დარღვევის ფაქტზე დააჯარიმა.
ამასთან, მოსკოვში დაბრუნებული რუსი ტელეწამყვანი ვლადიმერ პოზნერი უარყოფს ინფორმაციას იმის შესახებ, რომ ის საქართველოში კორონავირუსთან დაკავშირებული შეზღუდვების დარღვევისთვის დაჯარიმდა.
მან ადგილობრივ მედიას განუცხადა, რომ საქართველოში აუცილებლადისევ ჩამოვა.
