ჯანდაცვის მსოფლიო ორგანიზაციის ექსპერტთა ჯგუფის ხელმძღვანელის, დოქტორი პიტერ დასზაკის განცხადებით, ჩინეთის ხელისუფლებამ ექსპერტებს მათ მიერ მოთხოვნილ ობიექტებზე სრული დაშვება მიანიჭა. ამის შესახებ გამოცემა Associated Press წერს.
გამოცემის ცნობით, ჯანმო-ს ექსპერტთა ჯგუფს, კორონავირუსის წარმომავლობის შესასწავლად, ყველა მოთხოვნილ პირთან შეხვედრისა და სასურველ ტერიტორიაზე დაშვების უფლება ექნება.
პიტერ დასზაკის განცხადებით, უჰანის ვირუსოლოგიის ინსტიტუტში ვიზიტის გარდა, ჯანმო-ს ექსპერტთა გუნდმა უკვე მოინახულა უჰანის ზღვის პროდუქტების ბაზარი, სადაც კორონავირუსის პირველი შემთხვევა დაფიქსირდა. ამასთან, ჯგუფი იმ საავადმყოფოებსაც ესტუმრა, სადაც COVID-19-ით ინფიცირებულ პირველ პაციენტებს მკურნალობდნენ.
დასზაკმა აღნიშნა, რომ უახლოეს დღეებში ჯანმო-ს ექსპერტები მოპოვებულ მონაცემებს გაანალიზებენ და ჩინელ კოლეგებს გააცნობენ. წინასწარ დასკვნებს გუნდი ოთხშაბათს გამართულ ბრიფინგზე წარმოადგენს, რის შემდეგაც ჯანმო-ს ჯგუფი ჩინეთს დატოვებს.
