შეერთებული შტატები, ახალი ტიპის კორონავირუსის მზარდი სტატისტიკის გამო, მკაცრი და მომაკვდინებელი ზამთრის წინაშეა. ამის შესახებ ამერიკის დაავადებათა კონტროლისა და პრევენციის ცენტრის (CDC) ხელმძღვანელმა რობერტ რედფილდმა CNN-თან ინტერვიუში განაცხადა.
"დეკემბერი, იანვარი და თებერვალი ძალიან რთული პერიოდი იქნება. შესაძლოა ითქვას რომ ეს პეროდი ქვეყნის საზოგადოებრივი ჯანდაცვის ისტორიაში ყველაზე რთული იქნება", - თქვა რედფილდმა.
გამოცემა აღნიშნავს, რომ მოქალაქეთა მასობრივი ვაქცინა აშშ-ში ჯერ არ დაწყებულა. ამ დროისთვის ქვეყანა ნორმალური ცხოვრებისგან ძალიან შორს არის.
ბოლო მონაცემებით, COVID-19-ის პანდემიის მთელი პერიოდის განმავლობაში შეერთებულ შტატებში ინფიცირების 14,5 მილიონზე მეტი შემთხვევა დადასტურდა. ამავდროულად, ინფიცირებულთა დღიური მაჩვენებელი ქვეყნის მასშტაბით რამდენიმე დღის განმავლობაში სტაბილურად 200 ათას ადამიანს აღემატება.