ევროპის წამლის სააგენტომ (EMA) 5-11 წლის ბავშვებისთვის ამერიკული ფარმაცევტული კომპანიის Pfizer-ისა და მისი გერმანელი პარტნიორის BioNTech-ის ვაქცინა Comirnaty-ს გამოყენებას მხარი დაუჭირა.
ამის შესახებ ევროკავშირის მარეგულირებლის პრესრელიზშია აღნიშნული.
EMA-მ დაასკვნა, რომ "5-11 წლის ბავშვებში პრეპარატის გამოყენების სარგებელი აღემატება რისკებს, განსაკუთრებით იმ ბავშვებს შორის, რომლებსაც აქვთ თანმდევი დაავადებები, რომლებიც მძიმე ავადმყოფობის რისკს ზრდის“.
ცნობისთვის, აშშ-ის სურსათისა და მედიკამენტების ადმინისტრაციამ (FDA) კორონავირუსის საწინააღმდეგო Pfizer/BioNTech-ის ვაქცინის 5-11 წლის ბავშვებში გამოყენებას მხარი დაუჭირა.
ადმინისტრაციის ექსპერტთა ჯგუფმა 5-დან 11 წლამდე ასაკის ბავშვების Pfizer/BioNTech ვაქცინით აცრის რეკომენდაცია 27 ოქტომბერს გასცა.
კომპანიის მიერ ჩატარებული კვლევის თანახმად, კორონავირუსის საწინააღმდეგო Pfizer-BioNTech-ის ვაქცინა 5-11 წლის ბავშვებში კორონავირუსის წინააღმდეგ 90.7%-ით ეფექტურია.
აშშ-ის სურსათისა და წამლის ადმინისტრაცია (FDA) აცხადებს, რომ Pfizer/BioNTech-ის კორონავირუსის საწინააღმდეგო ვაქცინის 5-დან 11 წლამდე ასაკის ბავშვებში გამოყენების სარგებელი აშკარად აჭარბებს გულის კუნთის ანთების იშვიათი შემთხვევების რისკებს.
7 ოქტომბერს Pfizer–მა და BioNTech–მა განაცხადეს, რომ აშშ-ის სურსათისა და წამლის ადმინისტრაციას მიმართეს და 5-დან 11 წლამდე ასაკის ბავშვებში საგანგებო გამოყენების ნებართვის გაცემა ითხოვეს.